Zwjazk serbskich studowacych, wučomnikow a alumni

§ 1 Mjeno a sydło

I. Towarstwo mjenuje so „Zwjazk serbskich studowacych, wučomnikow a alumni“ (dale ZSS). Jako runoprawne mjeno za ZSS je „Župa Jan Skala“ dowolene.
II. Sydło towarstwa je w Budyšinje, Póstowe namĕsto 2.
III. Towarstwo njeje w towarstwowym registru při hamtskim sudnistwje w Budyšinje zapisane. Jeli pak rozsudźi hłowna zhromadźizna z 2/3 hłosow, zo so ZSS zapisa, přewza předsydstwo tutón nadawk hač do přichodneje hłowneje zhromadźizny.
IV. Mĕstno sudnistwa je Budyšin.

§ 2 Zamĕry

I. Aktiwne angažowanje za serbskich studentow, wučomnikow a alumni k nawjazanju stykow a wutworjenja serbskeje syće, wosebje zwonka serbskeho sydlenskeho ruma.
II. Dale zasadźuje so Zwjazk serbskich studowacych wo zachowanje, spěchowanje a rozšěrjenje serbskeje rěče a kultury we Łužicy a zwonka serbskeho sydlenskeho ruma, wosebje w zhromadnym dźěle ze studentami, wučomnikami a alumni.
III. Zwjazk serbskich studowacych podpĕruje organizatorisce a idejelnje aktiwity serbskich studentow a serbskich studentskich organizacijow (kotrychž dźěło wustawkam ZSS wotpowěduje).
IV. ZSS pěstuje kontakty k serbskim studowacym – we a zwonka Łužicy – kaž tež ke kóždolětnim nowym maturanćam.
V. Zdobom wudźeržuje ZSS kontakty k druhim towarstwam z podobnymi zaměrami.
VI. Zwjazk serbskich studowacych skutkuje njesebičnje a njesćĕhuje prĕnjorjadnje hospodarske zamĕry.

§ 3 Čłonstwo

I. W ZSS rozeznawamy krute a swobodne čłonstwo.
II. Jako swobodny čłon towarstwa móže so kóžda přirodna wosoba wuznać, kotraž je znajmjeńša 16 lĕt stara a so za zwoprawdźenje zamĕrow towarstwa zasadźuje. Wosebje pak studenća, wučomnicy a něhdyši studenća su namołwjeni so swobodnje w ZSS angažować.
III. Jako krući čłonojo (čłonojo z wosebitymi prawami) wobhladuja so čłonojo studentskich cyłkow:
a. Serbskeho studentskeho towarstwa „Bjarnat Krawc“
b. Serbskeho studentskeho towarstwa „Sorabija Lipsk“
c. Serbski studentski chór
d. Redakcija studentskeho časopisa „Šeršeń“
IV. Dale móža prawokmane a prawonjekmane serbske towarstwa, zjednoćenstwa a zhromadźenstwa ze samsnym zaměrom kruty čłon towarstwa być. Wo přiwzaću do kruteho čłonstwa rozsudźi předsydstwo z jednohłósnosću.
V. Wobsteji móžnosć spĕchowanskeho čłona. Spĕchowanski čłon je čłon towarstwa bjez hłosowanskeho prawa. Formy spĕchowanja rjaduja so přez zrĕčenja z předsydstwom.
VI. Próstwa wo čłonstwo ma so pola předsydstwa pisomnje zapodać. Runočasnje připóznaje stajer próstwy wustawki towarstwa.
VII. Jednotliwi čłonojo a towarstwa móža so z čłonstwa ZSS přez wobzamknjenje z 2/3 hłosow hłowneje zhromadźizny wuzamknyć.

§ 4 Financowanje

I. Dźěło towarstwa financuje so z pomocu darow a spěchowanskich srědkow.
II. Wobchodne lěto je kalendariske lěto.
III. Srědki smědźa so jenož za zaměry towarstwa, kaž su wone we wustawkach zapisane,
wužiwać. Žana wosoba njesmě přez wudawki, kotrež njesłuža zaměram towarstwa abo přez
njepoměrnje wysoke zarunanja, lěpšiny měć. Čłonam nimaja so pjenježne dary z
towarstowych srědkow płaćić.

§ 5 Towarstwowe organy

I. Organy towarstwa su:
• sobustawska zhromadźizna, kotraž so znajmjenša dwulětne schadźuje
• předsydstwo

§ 6 Sobustawska zhromadźizna

II. Najwyši organ towarstwa je sobustawska zhromadźizna.
III. Předsydstwo zwoła znajmjenša dwulětnje hłownu sobustawsku zhromadźiznu. Na
sobustawsku zhromadźiznu maja so wšitcy čłonojo najpozdźišo dwě njedźeli dočasnje přez
zjawnu informaciju přeprosyć. Runočasnje ma so dnjowy porjad na webstronje ZSS zdźělić.
IV. Sobustawska zhromadźizna je wobzamknjenja kmana, hdyž je znajmjeńša 20 swobodnych
abo krutych čłonow w tutym zaměrje přitomna. Kóždy čłon ma jedyn hłós.
V. Sobustawska zhromadźizna woli po wobzamknjenym wólbnym porjedźe dwulětnje
předsydstwo. Wona postaji předsydu, městopředsydu a pokładnika.
VI. Hłowna zhromadźizna ma hłowny nadawk, dwulětnu dźĕławosć towarstwa bilancować a
zasadne nadawki za přichodne lěta postajić. Nimo toho přijima rozprawu předsydstwa a
rozsudźi wo jeho wuwjazanju.
VII. Sobustawska zhromadźizna wothłosuje z jednorej wjetšinu hłosow. Za rozsud wo změnje
wustawkow stej dwě třećinje trěbnej.
VIII. Wo sobustawskej zhromadźiznje ma so protokol zhotowić, kotryž mataj nawoda
zhromadźizny a protokolant podpisać.
IX. Wurjadna sobustawska zhromadźizna ma so zwołac, hdyž sej to znajmjeńša 20 čłonow abo
dwě třećinje čłonow předsydstwa pisomnje z podaćom přičinow žada.

§ 7 Předsydstwo

I. Předsydstwo towarstwa wobsteji znajmjeńša z třoch a nic wjace hač dźewjeć čłonow. Su to
předsyda, městopředsyda, pokładnik a hač do 6 dalšich čłonow.
Komentar: W idealnym padźe je w předsydstwje ZSS znajmjenša jedyn čłon „Sorabije Lipsk“,
jedyn čłon studentskeho towarstwa „Bjarnat Krawc Drježdźany“, jedyn čłon dalšeho
studentskeho města a zastupjer ZSS w Zwjazkowym předsydstwje Domowiny zastupjeny.
II. Prawnisce a zwonkaprawnisce zastupuje towarstwo předsyda sam abo jeho městopředsyda a
pokładnik zhromadnje.
III. Předsydstwo wjedźe bĕžne naležnosće towarstwa a informuje čłonstwo w interneće.
IV. Předsydstwo zeńdźe so, hdyž sej to zajimy towarstwa žadaja abo hdyž to dwaj čłonaj
předsydstwa namjetujetaj. Předsydstwo je wobzamknjenja kmane, hdyž je wjac hač połojca
čłonow předsydstwa přitomna. Wobzamknje so z jednorej wjetšinu. Při jenakej ličbje hłosow
rozsudźi hłós nawody posedźenja předsydstwa. Předsydstwo je winowate před sobustawskej
zhromadźiznu rozprawjeć.

§ 8 Čłonstwa towarstwa

I. ZSS zarjaduje so do rynka sławnych dalšich serbskich zwjazkow a župow pod mjenom „Župa Jan Skala“ a je z tym čłon Domowiny - Zwjazka Łužiskich Serbow z.t. Z tym je kóždy čłon ZSS tež z čłonom Domowiny.
II. Znajmješa jedyn zastupjer ZSS měł studentske zajimy w Zwjazkowym předsydstwje Domowiny zastupować směć.
III. ZSS widźi so jako zastupjer zajimow serbskich studentow, wučomnikow a alumni.
IV. Sylne stołpy serbskeho studentskeho skutkowanja su w §3 (3) mjenowane cyłki. Tute spěchować a podpěrać je jedyn z hłownych nadawkow ZSS.

§ 9 Rozpušćenje towarstwa

I. Rozpušćenje towarstwa móže jenož k tutomu zamĕrej zwołana sobustawska zhromadźizna wobzamknyć. Na tutej zhromadźiznje dyrbi znajmjeńša 20 krutych čłonow a 2/3 čłonow předsydstwa přitomnych być. Znajmjeńša dwĕ třećinje hłosokmanych dyrbi rozpušćenju přihłosować.
II. Hłowna zhromadźizna k rozpušćenju towarstwa ma so potom zwołać, hdyž sej to znajmjeńša 20 krutych čłonow towarstwa žada.
III. Při rozpušćenju towarstwa ma zamóženje towarstwa Domowinje - Zwjazk Łužiskich Serbow připadnyć, kotraž smĕ tute bjezwuwzaćnje a njeposrĕdnje za powšitkownowužitne zamĕry wužiwać.

§ 10 Wšelčizny
I. Wobchadna rĕč w towarstwje je serbšćina.