Z Wuběrka Zwjazkoweho předsydstwa Domowiny za lobby-dźěło

Lobby-wuběrk Domowiny je so po lětnich prózdninach na poziciju k aktualnej debaće wo zjawnym lisće a iniciatiwje za nowelěrowanje serbsk

Sćěhowy posudk dawamy čłonam zwjazkoweho předsydstwa a wšěm zajimcam na wědomje:

1. Předsyda Domowiny, Dawid Statnik, je w lisće wšelakim politikarjam jednomyslne stejišćo zwjazkoweho předsydstwa sposrědkował, zo nochcemy so z tematiku ewentualneho nowelěrowanja serbskeho zakonja w Sakskej w času wólbneho boja zaběrać. Podpěrujemy tute postupowanje a wobžarujemy, zo buchu z kruha adresatow woprawnjene wobmyslenja Domowiny w medijach skandalizowane.

2. Witamy, zo je Domowina na njedawny zjawny list w tutym zwisku z poskitkom wotmołwiła (hlej wotpowědnu nowinsku zdźělenku), měnjenje podpisarjow do dalšich diskusijow zapřijeć. To je wobkrućenje zwólniwosće třěšneho zwjazka, ze wšěmi dialog pěstować, kotřiž chcedźa na dobro serbskeho ludu skutkować.

3. Smy jako lobby-wuběrk ze zastupjerjemi iniciatiwneje skupiny za serbski sejmik we wothłosowanju z předsydu Domowiny dialog wjedli z wuslědkom kataloga prašenjow a wotmołwow, dospołnje dokumentowanych w Serbskich Nowinach, zo by sej kóždy swoje měnjenje k tomu tworić móhł. To bě wažny přinošk k zjawnej transparency. Wotpowědnje wuprajamy so nětkole za so hodźacu formu diskusije třěšneho zwjazka ze štyrceći podpisarjemi zjawneho lista.

4. Domowina je jako třěšny zwjazk serbskich towarstwow, připóznata zastupjerka zajimow Serbow a partnerka komunalneje, krajneje, zwjazkoweje a europskeje politiki legitimowana, so z platformu nutřkoserbskeho dorozumjenja k wšěm konkretnym a powšitkownym prašenjam zastupnistwa serbskich zajimow na wšelakich runinach stać. Naše programatiske zakłady zamołwitosć, wotewrjenosć a zwjazanosć njech su nam z orientaciju. Tomu dyrbimy tež atmosferisce hišće bóle wotpowědować. Tomu pak njetyje, hdyž jednotliwcy spytaja, němskich politikarjow přećiwo Domowinje mobilizować^[1] – to je z našeho wida nadběh přećiwo suwerenemu sebjepostajowanju serbskeho ludu.

5. Měritko za móžne rozmyslowanje wo ewentualnych změnach sakskeho serbskeho zakonja njech su jeničce konkretna situacija Serbow w Sakskej a w serbskim ludźe samym artikulowana potrjeba dalewuwiwanja zakonskich postajenjow. Sakska njeje Braniborska. Wotpokazujemy zjawny ćišć přez abstraktne prawniskopolitiske diskursy. W tutym zmysle zasadźujemy so za wěcownu diskusiju a mamy rozmołwy, kotrež je předsyda Domowiny w tutej naležnosći hižo z wjele zamołwitymi politikarjemi wjacorych stron wjedł, za dobry započatk.

[1]

www.bild.de/regional/dresden/dr-matthias-roessler/sorben-aufstand-gegen-domowina-37401142.bild.html