Domowina ma jako zwjazk Łužiskich Serbow tež zwonka Łužicy čłonstwo w dźewjeć asociěrowanych towarstwach – jedne we Wendlandskej a Čěskej, dwě w Pólskej a Awstralskej, tři w USA. Kóždolětny hodowny postrow třěšneho zwjazka je předsyda Dawid Statnik loni z wosebitym listom jendźelskorěčnym towarstwam zwjazał. Nětk je wotmołwa wot Betty Huf, prezidentki „Wendish Heritage Society Australia“ z Awstralskeje dóšła. Mjeztym je Clemens Škoda, referent Domowiny za kulturne naležnosće a wukraj, na dźak a přeća asociěrowaneho towarstwa na pjatym kontinenće wotmołwił a so k tomu wupraja:„Potomnicy serbskich wupućowarjo słušeja hižo wjele lět cyle samozrozumliwje do našeje zhromadnosće. Woni su do kulturneje wuměny z našimi čłonami we Łužicy zapřijeći a zhromadnje so nadźijamy, po pandemiji zaso wuše styki pěstować móc. Wosebje Trudla Malinkowa měješe w zašłosći kontakt k tutym a naprašowanja z Texasa a Awstralskeje tež přeco zaso w Domowinje dóstawamy. Ćim bóle so wjeselimy, zo ma asociěrowane towarstwo z Awstralskeje wotpohlad, so w lěće 2022 składnostnje 800. róčnicy prěnjeho naspominanja Bukec do Łužicy podać. Tež Župa Jan Skala - Zwjazk serbskich studowacych chce rady zwisk k potomnikam Serbow w Texasu nawjazać a pyta tučasnje móžnosće realizacije tajkeho projekta.Rjenje je, hdyž so runje w „Lěće Zejlerja a Kocora” 2022 ludźo z cyłeho swěta ze swojimi serbskimi korjenjemi we Łužicy zaběraja. W „Lěće župow” wot 24.7.2021 budźe wuměna regionow we Łužicy w srjedźišću stać, tomu njech so potom w lěće 2022 – jeli so wuměnjenja zaso wotpowědnje polěpšeja – mjezynarodna wuměna přidružić. W tutym zmysle chcemy styki ze wšěmi po cyłym swěće, kotřiž su ze serbskim ludom kruće wjazani, nětkole intensiwować.”