Na župnym předsydstwje župy “Jan Arnošt Smoler” štwórtk popołdnju w Budyšinje dorozumichu so čłonojo wo doskónčnych lětušich namjetach za Myto Domowiny, za čestne znamješko a za Myto Domowiny za dorost. Dohromady zapoda Budyska župa pjeć namjetow za zasłužbne wosoby a cyłki na polu serbskeje rěče a kultury.

Sobotu, 1. julija, přeprošuje župa “Jan Arnošt Smoler” serbske swójby z Budyšina a wokoliny na swójbne popołdnjo do sundowner bary w Budyšinje. Wot 15 hodź. změja wjacore zabawy na zahrodźe Serbskeho ludoweho ansambla za dźěći spřihotowane. 

Čłonojo dorěčachu sej dale župnu kubłansku jězbu, kiž budźe 30. septembra a powjedźe w jubilejnym lěće Šěracha mjez druhim  ke kołopućej wo pčołakach do Budyšinka. Po tym póndźe dale na směr Delany.

Rěčna motiwatorka za Radwor, Rakecy a Wulku Dubrawu, Raphaela Wićazowa, rozprawješe wo swojich aktiwitach, kaž je to w Budyskim župnym předsydstwje z wašnjom. Wobdźěliła je so na spěwnym wječorku w Komorowje pola Rakec. Tamniša Domowinska skupina Komorow/Trupin/Rakecy a  Bjesada staj njedawno přeprosyłoj. Wothłós za serbski spěw ze skupinu Přezpólni a z 50 hosćimi bě přewšo dobry. Wo zarjadowanju “zhotowjenje křińčkow” w meji je zdobom krótki film w třoch rěčach zhotowiła. Film wo serbskim nałožku budźe so na Domowinskim youtubowym kanalu wozjewić.

Rjad přednoškow za Budyskich čłonow Domowinskich skupin je so derje zahajił. 20 zajimcow bě tydźenja na přednošk Bena Bělka wo jězbje do srjedźnjeje Afriki přišło. Dalši serbski přednošk ma 26. oktobra być.