Wólbny forum Domowiny a pósejźenje prezidiuma w Janšojcach

Pśisamem wšykne pśepšosone strony su se wobźělili na źinsajšnem wólbnem forumje Domowiny w Janšojcach. Do sportowego doma jo 50 zajmcow pśichwatało. Pśedsedaŕ Dawid Statnik jo witał pśibytnych w dolnoserbskej rěcy a jo diskusiju nawjedował.

Dwě temje stej stojałej wósebnje w fokusu wjacora: medije a kubłanje. Wólbne kopolaki Domowiny a wótegrona politiskich stronow na tute su byli zakład za rozgrona. Te jadne kśě dogrono za rozgłos wupowěźeś, te druge pśinosk znižyś, ale kwalitu zachowaś. Teke na zasadne wupominanje serbski powědajucego fachowego personala su byli wótegrona wšakorake.

Dalšna tema jo było wukubłanje serbskich wucabnikow. Tuchylu se dolnoserbske wucabniki w Lipsku a z tym w drugem zwězkowem kraju wukubłuju. Naraźenje, wukubłanje na BTU w Chóśebuzu-Złem Komorowje póbitowaś, wětšyna pśibytnych pódpěrujo. Teke za krotkocasne wupominanja serbskorěcnego wuwucowanja su byli někotare naraźenja z boka politiskich zastupnikow.

Zajmnu diskusiju jo wubuźiło pšašanje wokoło nałoga łapanje kokota. Organizacija PETA jo łoni skjaržyła, až se kokotki pó jich měnjenju mórjaju, aby je "za póchmurne nałogowe eventy znjewužywali". Wobskjaržba jo se wótpokazała. Wětšyna kandidatkow a kandidatow stoj za nałogom a co jen zachowaś. A běchu sebje wobjadne, až jo pśewjeźenje nałogi “wěc Serbow”.

Na wólbnem forumje su se wobźělili: Isabel Hiekel (MdL, Zwězk 90 / Zeleni), Annett Bauer (Lěwica), Lars Katzmarek (SPD), Falk Peschel (BSW), Jeff Staudacher (FDP), Steffen Kubiki (MdL, AfD) a Susanne Seng (CDU).

Z pósejźenja prezidiuma Domowiny w Janšojskem domowniskem muzeju

Swójo 36. pósejźenje jo prezidium Domowiny źinsa w Janšojcach, w Serbsko-nimskem domowniskem muzeju, pśewjadł.

Łoni w juniju jo wuběrk za nutśikownu demokratiju a serbsku ciwilnu towarišnosć diskusiju wó nowem programje zachopił. W mjazycasu su zajmce a zajmce program cesnoamtski pśeźěłali. Teke gremije Zwězkowego pśedsedaŕstwa Domowiny zaběrachu se z pśedłogu. Dalej jo teke zjawnosć napominana, se na diskusiji wobźěliś. Mjaztym jo wuběrk pód nawjedowanim Damiana Dyrlicha 3. pśedłoga naźěłał, kótaryž buźo se na pśiducem wobradowanju zwězkowego pśedsedaŕstwa dnja 27.09.2024 w Slěpem pśedstajiś. Program Domowiny ma se na znowa głownej zgromaźinje Domowiny schwaliś.

Pó wustawje města Chóśebuz pśistoj serbskemu ludoju zastupnica abo zastupnik we wuběrkach města. Tak jo kšywowy zwězk napominany zapódaś naraźenja do tśich wuběrkow. Prezidium delegěrujo we wótgłosowanju ze župu Dolna Łužyca slědujucych zastupnikow:

- Francisku Albertowu (familijowe zjadnośeństwo GROMAŹE) do wuběrka za młodźinsku pomoc

- Angelu Šurmanowu (Domowinska kupka Chóśebuz) do wuběrka za kubłanje, šule, sport, kulturu a serbske nastupnosći

- Ole Schmalfuß (Domowinska młoźina Žylow) do wuběrka za socialne, rownostajenje a pšawa mjeńšynow.

Delegatki a delegat su za pśiducu legislaturnu periodu (2024-2029) z póraźujucym głosom do wuběrkow pówołane.

Na dalšnem źěłowem planje su stojali wólby do Rady za serbske nastupnosći w Sakskej za cas 2024-2029, kótarež se pśewjedu tejerownosći na pśiducem wobradowanju zwězkowego pśedsedaŕstwa dnja 27.09.2024. kandidatkow abo kandidatow ma zwězkowe pśedsedaŕstwo wuzwóliś. Do kóńca casa zapódaśa naraźenjow pśedlažy pěś wósobow, kótarež su zwólniwe, se w Serbskej raźe angažěrowaś.

W ramiku swójogo pósejźenja jo se rozgranjał prezidium ze zjadnośeństwom “Serbski sejm” a pśepšosył je pó tom na wólbny forum Domowiny.

Foto:Domowina/Judit Šołćina