Prof. Barbara Wuttke, direktorka powołanskeje akademije (BA) Budyšin, a Matthias Untisz, jedyn jednaćel „inku-BA-tor. das wirtschaftslabor“, běštaj z hosćom w Budyskim Serbskim domje w rozmołwje z Pětrom Brězanom, referentom Domowiny za hospodarstwo a infrastrukturelne naležnsće, předsydu třěšneho zwjazka, Dawidom Statnikom, a jeho jednaćelom Markom Kowarjom (w.l.).Wuchadźišćo je zhromadne rozmyslowanje wo strukturnym wuwiću w zwisku ze zakónčenjom wudobwanja brunicy hač do lěta 2038, kak móže BA přinošować. Budyska BA je wobstatk zwjazka sydom BA w Sakskej. Profesorka Wuttke rozmysluje mjez druhim wo tym poskićić wukubłanje, kiž je „jenož“ w Budyšinje reflektujo euroregion a zhromadne žiwjenje Serbow a Němcow (tak mjenowany USP, „Alleinstellungsmerkmal” – prošu wo namjety za serbske zapřijeće). Rozmołwy maja so na jeje přeće w nowembru pokročować.Dawid Statnik, předsyda Domowiny: „Połowanske akademije su kruty wobstatk Sakseho kubłanskeho systema. Budyska powołanska akademija je kruće zakótwjena w regionalnym hospodarstwje. Kaž Domowina ma tež kubłanska akademija zajim na skrućenju regionalnych hospodarskich cyłkow. Rozmołwu wužiwachmy, zo bychmy dotalne dobre zhromadne dźěło skrućili. Tež chcemy pruwować, hač mamy na polu strukturneje změny a hospodarstwa móžnosće, zhromadne ideje a projekty wuwiwać.“