Pjatk popołdnju běštaj předsyda Domowiny, Dawid Statnik, a regionalna rěčnica třěšneho zwjazka za teritorij župy „Handrij Zejler”, Sonja Hrjehorjowa, na nastupnym wopyće pola noweho wyšeho měćanosty Wojerec, Torstena Rubana-Zeha (SPD). Dawid Statnik naspomniwši, zo je Ruban-Zeh hižo jako kandidat do wólbow na prašenja Domowiny wuznam wuskeho zhromadneho dźěła z třěšnym zwjazkom Łužiskich Serbow wobkrućił, zwěsća: Na to chcemy rady praktisce a stajnje na dobro serbskich zajimow a cyłeho regiona nawjazać. Sonja Hrjehorjowa steji jako spušćomna partnerka na městnje k dispoziciji. Wšitcy třo běchu sej přezjedni, zo bywaju Wojerecy jako město srjedź Łužicy, hdźež bu Domowina załožena, lěto a wuznamniše za serbsku rěč a kulturu – tež dźakowano mnohostronskemu angažementej čestnohamtskich a towarstwow w měsće a jeho wsach.Statnik chwaleše prócu wo zdźěrženje serbšćiny: „Wosebje na zakładnej šuli Při worjole ,Handrij Zejler‘ so serbska rěč aktiwnje pěstuje. Tohorunja móža tež gymnaziasća serbsce wuknyć. Wotpowědujo woli wjele staršich bychmy witali, hdyž by tež na wyšej šuli města móžno było, serbsce wuknyć. Z tym by wobstajny puć kubłanja móžne był, kiž tuchwilu njeje.”Zastupjerjej Domowiny staj wšelake projekty narěčałoj, kotrež su mjez druhim w zwisku z wopominanjom 100. róčnicy załoženja župow we Wojerecach planowane. Dokładniše plany měli so z přiradu a ze społnomócnjenej za serbske naležnosće města, Gabrielu Linakowej, dorěčeć.„Knjez Ruban-Zeh budźe za serbske aspekty města a za nas dobry partner. To ma wočiwidnje tež něšto z dwurěčnosću činić, kotruž wón sam doma praktikuje. Wjeselimy so na dalše zhromadne dźěło,” tak Statnik po zetkanju.