K dźensnišemu oficielnemu wuznamjenjenju mytowanych w lětušim wubědźowanju „Čiń sobu” Swobodneho stata Sakska w Drježdźanach so předsyda Domowiny, Dawid Statnik, wupraja:„Jako třěšny zwjazk Serbow so wšěm dźakujemy, kotřiž su ze swojimi projektami k zwjazanosći cyłeje towaršnosće w našej zhromadnej domiznje přinošowali. Wosebje so wězo wjeselimy nad 47 mytowanymi projektami w kategoriji ,žiwa dwurěčnosć’, kotrež su so skrućenju a dalšemu wuwiću našeje maćeršćiny wěnowali, k tomu je hišće poł ducenta dalšich ze serbskim aspektom w druhich kategorijach.Fonds ,Čiń sobu’ je dobry přikład za njeběrokratiske spěchowanje projektow, kotrež je wěcywustojny gremij (jury) wuběrał. Tohodla so tež wšěm wosobinsce dźakuju, kotřiž su ze swojim sobuskutkowanjom wubědźowanju tež w druhim kole k wuspěchej dopomhali. ,Čiń sobu’ a wotpowědne wubědźowanja w Braniborskej kaž ,serbski pśichod: Łužyca‘ su nam hoberski potencial horliwosće za serbsku rěč a kulturu wotkryli, kiž ma so dale swěru pěstować. Tohodla sej nowy njeběrokratiski fonds za mikroprojekty ze srědkow Załožby za serbski lud přejemy. Z tym móhli so přichodnje stajnje tajkele projekty podpěrować, kotrež – lokalnje zakótwjenje – regionalnym rěčnym rumam po cyłej Łužicy přinošuja.” Přehlad mytowanych projektow scomter městnosćemi jich zwoprawdźenja: https://www.mitmachfonds-sachsen.de/preistraeger2020/sorben/

www.mitmachfonds-sachsen.de/preisverleihung-2020-der-saechsischen-mitmach-fonds-in-dresden/