Sakske statne knježerstwo wobzamkny dnja 18.06.2019 druhi plan naprawow k spěchowanju serbskeje rěče we wšelakich wobłukach zjawneho žiwjenja. Z tym wotpowěduje nadawkam z wustawy a ze Serbskeho zakonja Sakskeje k škitej a spěchowanju serbskeje rěče. Předsyda Domowiny Dawid Statnik hódnoći plan “jako dobry přewod k prawniskim zakładam spěchowanja serbskeje rěče a směrodajnje za dalše polěpšenje situacije serbskeje rěče” a pokaza na to, zo su wšelake zaměry plana tež w dźěłowych směrnicach Domowiny za dobu 2019-2021 zakótwjene.Plan bu dnja 3. julija Sakskemu krajnemu sejmej přepodaty.Domowina wita dalewuwiće prěnjeho plana a běše sama kaž tež Rada za serbske naležnosće Swobodneho stata Sakska na koncipowanju plana wobdźělena. Domowina zapoda 28 namjetow a Serbska rada 5 namjetow. Doskónčny plan wupokaza pod rubriku “namjet wot” šěsć króć Domowinu a trójce Serbsku radu. “Za přewzaće našich nastorkow smy jara dźakowni, hačrunjež njeje so poradźiło, zo so wšě wobkedźbuja. Parujemy na přikład naprawy, kotrež so wusměrjeja na dwurěčnosć w tajkich wobłukach kaž hospodarstwo, zjawny wosobowy bliskowobchad (ÖPNV), póštu a předewzaća turizma”, praji referent Domowiny Werner Sroka.Aktualny plan pak wobsahuje rjad naprawow, kotrež bychu móžnosće nawuknjenja serbšćiny, zjawnje widźomnu dwurěčnosć a zjawnostne dźěło k serbskej rěči polěpšić móhli. Wosebje mjenować maja so tajke předewzaća, kaž:- wutworjenje Serbskeje rěčneje šule za hornjoserbšćinu w Budyšinje,- zarjadowanje stajneho serwisoweho běrowa za serbsku rěč we Wojerecach,- wot tutoho lěta sem planowana wabjenska kampanja k zwyšenju nahladnosće serbskeje rěče w zjawnosći a- prócowanja wo dwurěčnosć při awtodróhach.Za lěće 2019 a 2020 je Domowina hižo dźěłowej městnje přełožowarjow za mjenowany serwisowy běrow, kotryž ma so w Domowinskim domje we Wojerecach zaměstnić, wupisała. Kaž plan wupokaza, ma so tutón běrow jako stajne zarjadnišćo dale wjesć, štož bychu wosebje komuny serbskeho sydlenskeho teritorija jara witali.„Nadźijamy so, zo so plan bórze dwurěčnje wozjewi a partneram naprawow přepoda. Domowina je wězo zwólniwa, zwoprawdźenje plana aktiwnje podpěrować a namołwi wšitkich akterow k zaměrnemu dźěłu za serbsku rěč“, měni D. Statnik.