Z posedźenjom poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho zakónčitej so dźěłapołnej dnjej Domowiny w Berlinje.

 Srjedu, dnja 7.11.2018, wobdźělachu so zastupjerjo Domowiny na dźěłowej konferency Zwjazkoweho ministerstwa nutřkowneho.

W prěnim dźělu posedźenja wothłosowaše so rozprawa Němskeje nastupajo přesadźenja postajenjow europskeho ramikoweho dojednanja k škitej narodnych mjeńšinow. Tež Domowina měješe móžnosć stejišćo zapodać a pokaza mjez druhim na trěbnosć zwyšenja wusyłanskich časow MDR a RBB, runje tak, kaž na politisku winowatosć Zwjazka a krajow, narunać straty, nastate přez zmilinjenje brunicy a z tym zwjazowacym wotbagrowanjom serbskich sydlišćow a wjeskow. Dale pokaza na trěbnosć prawidłowneho přepruwowanja wuslědkow kubłanskich koncepcijow w šulstwje a pěstowarnjach a na wobstejace žadanje Domowiny, Serbam zmóžnić stajne městno w rozhłosowej radźe MDR.

W druhim dźělu konferency zaběrachu so přitomni z młodźinskim dźěłom wšitkich štyri narodnych mjeńšinow Němskeje. Rozprawy podachu zastupjerjo młodźiny, kotrež so na posedźenju wobdźelichu. Za Serbow rozprawjachu Franciska Albertowa, Ella Bergelec a Chrystof Growa.

Wječor přizamkny so swjatočnosć k 30 lětnemu wobstaću funkcije społnomócnjeneho zwjazkoweho knježerstwa za wusydlency a narodne mjeńšiny.

Štwórtk, dnja 8.11.2018, zetkachu so předsyda Domowiny, Dawid Statnik, jednaćel Domowiny, Marko Kowar a wjednica mjeńšinoweho sekretariata, Judit Šołćina, ze zapósłancom Zwjazkoweho sejma Stefanom Kühnom (Zeleni). Mjez druhim wěnowachu so dwurěčnosći wobchadnych taflow při awtodróhach. Přičina je, zo zwjazkowe knježerstwo přesadźenje dwurěčnosće dale wotpokaza.

Zapřijeće serbskich zajimow a konkretne praktiske přesadźenje toho w zwisku ze strukturnej změnu Łužicy, běše hłowny tema zetkanja Domowiny ze społnomócnjenym Swobodneho stata Sakskeje, statnym sekretarom Erhardom Weimannom. Při tym pokazaštej Statnik a Kowar na to, zo nima so jenož hospodarstwo spěchować ale wosebje tež wobydlerstwo Łužicy při tym přewodźeć. Je wažne zo so woni jako akterojo do procesa strukturneje změny zapřija. Tak měli so na městnje ideje a móžnosće wuwić a spěchować.

Na posedźenju poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho wobdźělachu so nimo zastupjerjow ministerstwa a krajneju knježerstwow Braniborskeje a Sakskeje zastupjerjo Domowiny (Dawid Statnik, Wylem Janhoefer a Marko Kowar) a Załožby za serbski lud (Susan Šenkec a Jan Budar). W rozprawje wo połoženju serbskeho ludu rysowaše předsyda Domowiny aktualnu situaciju. Tež tu běše tema strukturna změna Łužicy, dwurěčnosć na awtodróhach a trěbnosć polěpšenja kubłanja. Dalše temy běchu dźěło z młodźinu, přihoty za nowe financne zrěčenje załožby wot lěta 2021, iniciatiwa Minority SafePack, digitalizowanje hornjo- a delnjoserbskeje rěče, kaž tež zamołwitosće Zwjazka za serbske naležnosće. Posedźenje nawjedowaše prěni raz nowy społnomócnjeny Zwjazkoweho knježerstwa dr. Bernd Fabritius.