W Starej chemijowej fabrice w Choćebuzu schadźowachu so 22. jutrownika 112 delegatow z Hornjeje, srjedźneje a Delnjeje Łužicy. Wyši měšćanosta Choćebuza Tobias Schick delegatow powita. Wón podšmórny, zo je hajenje serbskich tradicijow wažne za skrućenje identity. Přitomnych młodostnych namołwješe sobu skutkować a so w serbskich kruhach angažować. Prezidentka Braniborskeho krajneho sejma, prof. dr. Ulrike Liedtke, zwurazni w swojim witanju, zo stej mnohotnosć a toleranca wažny dźěl Braniborskeje.

W prěnim dźělu posedźenja słyšachu delegaća rozprawu wo dźěławosći zašłeju lět, kotruž předsyda Domowiny Dawid Statnik přednjese. Wón wěnowaše so połoženju serbskeho ludu. Wuzběhny, zo je so z pomocu srědkow strukturneje změny poradźiło, strategiske planowanje rěče přez “Zorja” w Delnjej Łužicy a “Syć za regionalnu identitu a serbsku rěč” w Hornjej Łužicy podpěrać. Kubłanje je šěroke polo. Njezadźiwa tuž, zo so podpěra w šulach k spěchowanju serbšćiny w běhu schadźowanja husto narěča. Na kóncu zjima: “Wutk Domowiny je serbsku rěč a identitu hajić a spěchować.”

Marko Wjesela, předsyda rewizijneho wuběrka, poda rozprawu a zwěsći, zo je ličba projektow jasnje rozrostła. Skedźbni na to, zo wučinja třeće srědki cyłkowneho finančneho plana Domowiny lětsa hižo hač do 40 procentow. Doporuči pruwować, kotre nadawki nimo zakładneje dźěławosće Domowina do přichoda přiwza.

Předležace rozprawy delegaća po diskusiji schwalichu resp. přijimachu.

Prašenje, hač smědźa Domowinjenjo we nawjedowacych funkcijach wukonjeć dalše politiske mandaty zwonka třěchi, wuwabi diskusiju. Prawniski wuběrk a zwjazkowe předsydstwo staj so w zašłych měsacach z temu zaběrałoj. Delegaća slědowachu we wjetšinje doporučenju, zo měli so Serbja aktiwnje na wšitkich politiskich runinach angažować.

Nowostku předstaji dr. Beata Brězanowa, nawodnica Rěčneho centruma WITAJ. Firma Microsoft je swój přełožowanski program z delnjoserbšćinu dale rozšěriła. Aktualny staw ZORJA-projekta poda Maximilian Hasacky, kiž projekt nawjeduje. Mjeztym ma mały team rěčnych trenarjow. Zamołwići tuchwilu z 21 požadarjemi, kiž chcedźa w běhu 10 měsacow delnjoserbšćinu nawuknyć, rozmołwy wjedu. Dr. Anja Pohončowa, předstaji w mjenje Maćicy Serbskeje zjawnu diskusiju wo serbskej hymnje. Proces je pokazał, zo su měnjenja a stejišća jara rozdźělne. Zo by kóždy móhł hymnu tak spěwać, kaž ma to za prawe, je dr. Pohončowa rozdźěliła wizitki z nowej wersiju hymny.

Do připołdnišej přestawki zahudźištaj a zaspěwaštaj Gerhard Pauker a Gerald Šěn krasne ludowe spěwy na tradicionelnych instrumentach. Zhromadnje zaspěwachu přitomni „Ty sy tajka wikotata“.

W druhim dźělu zhromadźizny schwalichu delegaća dźěłowe směrnicy z dwěmaj dodaćomaj. Tute so w přichodnych dnjach na webstronje Domowiny wozjewja. Dalše namjety, kotrež župa Delnja Łužica předpołoži, su so k dalšemu wobdźěłanju do zwjazkoweho předsydstwa sposrědkowali.

Delegat Sieghard Kozel přestaji namjet za kubłansku awtonomiju, kotruž je w mjenje podpisarjow zapodał a předstajił. Namjet wuwabi mjez delegatami mnoho diskusijow. We wuslědku diskusije Kozel swój namjet cofny. Zdobom připowědźi, zo chce namjet kwalifikować.
Hłowna zhromadźizna zahaji diskusiju wo programje Domowiny. Do tuteje Damian Dyrlich, předsyda wuběrka za nutřkownu demokratiju a serbsku ciwilnu towaršnosć, wšitkich přeprošuje. Hižo 9. junija z diskusiju pokročuja.

Zhromadźizna je jako widejo dale na YouTube-kanalu Domowiny přistupna.

Wuslědki zhromadźizny a narěč předsydy so na webstronje Domowiny wozjewja.

link na widejo: https://www.youtube.com/watch?v=vbhm7rEaWmE

PDF: Wurězk ze źěłabnosći Domowiny pó 20. głownej zgromaźinje

fota: Jurij Helgest