Póndźelu, 13.6., swjeći w Radworju bywši dołholětny předsyda Domowiny, Jan Nuk, swoje 75. narodniny. Jeho naslědnik Dawid Statnik jemu wosobinsce gratuluje:

„Jan Nuk je so čas žiwjenja njebojaznje za naše Serbstwo zasadźował. Jako předsyda Domowiny je prawa našeho ludu tež w konfliktach z knježacej politiku zmužiće zastupował. Wosebje njezapomnity wostawa jeho angažement w Chróšćan zběžku, kotryž začinjenju tamnišeje srjedźneje šule drje zadźěwał njeje, narodne wědomje Serbow pak hač do dźensnišeho njesměrnje krući.

Nadźijamy so, zo budźe nam Jan Nuk při rubanju nowych pućow do přichoda dale poboku, kaž je wón poměrnje njedawno prócowanje wo natwar ,Zwjazka serbskich šulow’ iniciěrował. Hdyž je trjeba, Jan Nuk tež chroble wustupuje, ale ženje bjez rozuma. Sym jemu tež wosobinsce za wšu radu a podpěru dźakowny. Za čas přewróta je wón ze swojim skutkowanjom w Serbskej narodnej zhromadźiznje Domowinu a narodnu politiku wobnowił. Zo je wón njehladajo wužadanjow jako předewzaćel w lěće 2000 tehdom hišće čestnohamtsku funkciju předsydy Domowiny pod ćežkimi wuměnjenjemi přewzał, sej wulke připóznaće zasłuža.

Janej Nukej přeco načasne towaršnostne serbske žiwjenje na wutrobje leži. Jeho mudry a doprědkarski duch runje nětko w procesu změny strukturow dale trjebamy, hdyž wo wobnowjenje našeje dźěławosće dźe, kotrejež zaměr je naslědniša skutkownosć wosobje při wuwiwanju nowych rěčnych rumow. Tohodla njech Jan Nuk naše dźěło dale z kritiskim wóčkom přewodźuje. Zdobom jemu wjele wjesela w jeho wulkej serbskej swójbje přejemy.”