Prezidij Domowiny je so wutoru wječor prěni raz po lětnich prózdninach schadźował, to běše zdobom konstituowace posedźenje po lětušej hłownej a wólbnej zhromadźiznje. W sydarni Budyskeho Serbskeho domu a online su w běhu pjeć hodźin někak třitřeći dypkow rozjimali. Nowy cłon najwyšeho dźěłoweho gremija třěšneho zwjazka mjez wuradźowanjemi zwjazkoweho předsydstwa je dr. Hartmut Leipner, městopředsyda z Delnjeje Łužicy, dale prezidijej znowa předsyda Domowiny Dawid Statnik a hornjołužiski městopředsyda Marko Hančik přisłušataj. Dalšeju čłonow woli zwjazkowe předsydstwo na namjet předsydy hišće za tutu legislaturnu periodu.

Prěni rozsud běše zestawa delegacije Domowiny na FUEN-kongresu w italskim Triesće wot 9. do 12. septembra. Serbow tam Felicia Touvenot (młodźinske towarstwo „Pawk”), Maksimilian Hasacki (z Delnjeje Łužicy) a Dawid Statnik (z Hornjeje Łužicy) jako nawoda zastupuja. Schwalił je prezidij tež spěchowanje kulturneje wuměny towarstwa „Pawk” z młodostnymi europskeje organizacije MENS zapřichodny kónc tydźenja w Budyšinje. 

Zjawne posedźenja zwjazkoweho předsydstwa dyrbjeli tež njewotwisnje wot pandemije dale přez livestream wšěm zajimcam spřistupne być, to prezidij poruča. Dotalna rezonanca z hač do 170 přihladowarjemi pokazuje na wulki zjawny zajim, kotremuž chce prezidij wotpowědować. Zdobom je prezidij naćisk dnjoweho porjada zwjazkoweho předsydstwa 24. septembra w Choćebuzu přihotował. Na tutym posedźenju ma so tež serbske městno w rozhłosowej radźe MDR wobsadźić a naslědnistwo jednaćela zrjadować, kiž so kónc lěta na wuměnk poda.

Na swoje wólbne kopolaki je Domowina dotal wotmołwy z CDU/CSU, SPD, Zelenych a Lěwicy dóstała. Přichodny tydźeń chcedźa wuslědki naprašowanja w zwisku z wólbami do zwjazkoweho sejma wozjewić.