Zarjadniske wjednistwo Domowiny je so na swojim dźensnišim digitalnym wuradźowanju z mnohimi lětušimi wupisanjemi dźěłowych městnow w třěšnym zwjazku Serbow zaběrało. K tomu słušetej městno referenta za komunalne, gremijowe a ministerialne naležnosće w Chóśebuzu wot 1. julija a referent za naležnosće kubłanja a spěchowanje dorosta ze sydłom we Wojerecach wot 1. apryla. Wobaj změjetaj zamołwitosć za cyłu Łužicu. Nimo toho ma so městno referenta za naležnosće třěšneho zwjazka wot 1. awgusta znowa wobsadźić, dokelž so Werner Sroka na wuměnk poda. Zdobom chcedźa wupisać nadawk rěčneho motiwatora za Delnju Łužicu, w Hornjej Łužicy je nětk přistajenje druheho rěčneho motiwatora předwidźane, dotal tajku funkciju hižo jara wuspěšnje Lucian Kaulfürst w Malešecach wukonja. Wot póndźele dźěła Virginia Hanuzowa jako kubłanska referentka Domowiny za młodźinu na teritoriju wokrjesow Budyšin a Zhorjelc, na zakładźe srědkow młodźinskeje pomocy přewažnje z kraja a komunow.K aktualnemu stawej wuwića personala Domowiny so Marko Kowar, jednaćel Domowiny, wupraja:„Nadawki so rozšěrjeja abo tež přiběrajcy profesionalizuja. Telko nowych serbskich dźěłowych poskitkow naraz we wobłuku třěšneho zwjazka po přewróće ženje było njeje. To je wulka šansa młodym Serbam, dobre dźěło na dobro Serbstwa w swojej domiznje nadeńć, a zdobom za nas wšěch, nowych ludźi a nowu generaciju do profesionelneho narodneho dźěła a jako podpěraćelow čestnohamtskich zdobyć. Nam je wažne, při wobsadźenju městnow stejnišća po cyłej Łužicy zapřijeć a nimo Hornjeje sylnišo Delnju a srjedźnu Łužicu wobkedźbować. Skrućenje a wožiwjenje rěčnych rumow je bytostne wužadanje našeho ludu, tohodla maja tak mjenowani rěčni motiwatorojo lěto a wažniši nadawk – jako posoljo serbšćiny su woni wšudźe ludźom poboku, kotřiž so za našu maćeršćinu we wšědnym žiwjenju angažuja. Wupisanja so nětko přihotuja.Nowaj referentaj mataj potencial tuchwilneje doby změny strukturow wužiwać. Referent/ka za komunalne, gremijowe a ministerialne naležnosće ma naše zwiski na wšěch politiskich runinach zesylnjeć a zastupowanje zajimow serbskeho ludu hišće bóle efektiwizować. Referent/ka za naležnosće kubłanja a spěchowanje dorosta ma serbske kubłanskopolitiske dźěło w Braniborskej a Sakskej na starosći a z kubłanišćemi po cyłej Łužicy kooperować.”