Wutoru, 15.3., zetka so kulturny wuběrk Domowiny ze zastupjerjemi wjednistwa Załožby za serbski lud, Serbskeho muzeja a Serbskeho instituta. Jedyn nadawk z (na Hłownej zhromadźiznje w Slepom 2021) wobzamknjenych dźěłowych směrnicow je, zo „Domowina iniciěruje a podpěruje dźěło ,Fachoweje komisije za serbske narodno-kulturne namrěwstwo’. Zaměr komisije je, zdźěłać a namjetować wotpowědne nošne struktury.”

Tak je po měnjenju wuběrka konsens : We wulkoprojekće „Lawske hrjebje” tča wulke šansy, wo nowych strukturach a perspektiwach rozmyslować.

Feliks Ričl, předsyda wuběrka, praji: „Nowy areal wotkryje nam wulki potencial za wuwiće Serbskeho instituta a Serbskeho muzeja. Dale pak měli my, jako zastupjerjo ciwilneje towaršnosće, sobu rozmyslować, kotre móžnosće za nowe formy wobchadźenja z kulturnym herbstwom my z tutym projektom dóstanjemy a kak hodźa so tež dalši akterojo do wuwića tutoho noweho doma zapřijeć. Tam jako wuběrk rady sobu za pućemi pytamy a smy jako partner pomocliwje po boku.”

Jan Budar, direktor Załožby za serbski lud, předstaji na wuradźowanju tučasny staw wokoło planowanja a rozkładźe wužadanja při realizaciji. Hauke Bartels a Andrea Pawlikowa rysowaštej předstawy swojeju institucijow, Serbskeho instituta a Serbskeho muzeja, a staw přemyslowanjow. Wonaj wuzběhnyštaj ze swojeje perspektiwy fokus na nowe formy dźěławosće a wobkedźbowanje tutych w planowanju. Dawid Statnik a Susan Šenkec pokazaštaj na wažnosć projekta za wonkowny wobraz wo Serbach, ale tež na funkciju noweho domu za Serbow samych, wosebje jako rěčny rum.

Kulturny wuběrk nadźěła nětko ze zběranych dopóznaćow komisije za serbske kulturne herbstwo (dźěłaše 2018-2020 jako dźěłowa skupina wuběrka) aspekty potrěbnosće ciwilno-towaršnostnych akterow a namjety za wobkedźbowanje při koncepciji noweho serbskeho „Foruma wědy” při Lawskich hrebjach.

Jeli maće hišće prašenja, wobroćće so prošu na sekretara wuběrka, kulturneho referenta Clemensa Škodu, tel.: 0 35 91 / 55 02 08, mobil: 01 73 / 3 51 54 40