Hač do 30. junija je lětsa składnosć, zasłužbne wosoby za lětuše wuznamjenjenje z Mytom Domowiny, z Mytom Domowiny za dorost a z Čestnym znamješkom Domowiny namjetować. Čłonojo župow, towarstwow a jednotliwcy su prošeni, swoje namjety za wuznamjenjenje na slědowacu adresu zapodać:Domowina - Zwjazk Łužiskich Serbow z. t.Póstowe naměsto 2/Postplatz 202625 Budyšin/Bautzen.Swój namjet móžeće tež z e-mejlku pósłać na clemens.skoda@domowina.de.Z Mytom Domowiny maja so ći počesćić, kotřiž so na wusahowace wašnje zaměrnje a wuspěšnje za zachowanje a wozrodźenje serbskeje kultury, wosebje pak serbskeje rěče zasadźuja. Z Mytom Domowiny za dorost wuznamjenja so jednotliwcy abo wjacore wosoby zhromadnje, kotřiž so na wusahowace wašnje na młodźinskim a dorostowym polu za serbsku rěč a kulturu angažuja.Z Čestnym znamješkom Domowiny připóznawaja so zasłužby w towarstwowym dźěle, zwoprawdźejo program a směrnicy Domowiny.Mytowanski wuběrk prosy wo to, za namjet nowy formular wužiwać, kotryž je na webstronje składowany: http://www.domowina.de/hsb/domowina/wuberki/mytowanski-wuberk.W tutym dokumenće namakaće dalše informacije. Jeli maće k tomu prašenja, móžeće so tež rady direktnje na zarjad Domowiny wobroćić: Clemens Škoda, referent Domowiny za kulturu a wukraj, e-mejlka: clemens.skoda@domowina.de, tel. 03591 550-208.