Jednaćel Domowiny Marko Kowar je dźensa nowu projektnu sobudźěłaćerku třěšneho zwjazka za srjedźnu Łužicu, Marku Suchec, do domu Domowiny we Wojerecach witał. 36-lětna mać dweju dźěsćow ze Sulšec je wot dźensnišeho wosebje serbskim towarstwam na teritoriju župow "Handrij Zejler" a "Jakub Lorenc-Zalěski" poboku. Dotal wona jako sobudźěłaćerka za serbsku rěč a kulturu w Krabatowym młynje dźěłaše. Nětko so wona mjez druhim zakótwjenju serbšćiny w projektach po cyłych Wojerowskich a Slepjanskich kónčinach wěnuje.Marko Kowar: "To je dalši krok za regionalizowanje našich mocow a za skrućenje Serbstwa we wšěch kónčinach Łužicy." Nowa projektna sobudźěłaćerka budźe z kolegomaj w Hornjej a Delnjej Łužicy a z regionalnymi rěčnicami Domowiny kooperować.Foto: Jednaćel Domowiny Marko Kowar a nowa sobudźěłaćerka za serbske projekty w srjedźnej Łužicy Marka Suchec před domom třěšneho zwjazka we Wojerecach. Foto: Domowina.