Runje na dnju zelow (15.8.) zetkachu so 14 Serbowki a Serbja z Budyšina a wokoliny na Domowinsku zhromadźiznu. Dokelž chcemy sej serbskorěčne rumy stworić, je Budyska župa wšitkich přeprosyła na faru při Michałskej cyrkwi.

Najprjedy smy sej šalku kofeja popřeli a dobry Chróščan tykanc woptali a so do rozmołwy dali. Potom je županka wo přichodnych předewzaćach župy rozprawjała, zo chcemy bój staršich w Radworju a w Bukecach wo serbsku skupinu a rjadowni dale podpěrać a zo wotkrywamy z Malešan gmejnu sobu  7.9. w 14.00 hodź. na kěrchowje w Budyšinku pomnik k česći 300.narodnin Hadama Bohuchława Šěracha. Woni zhonichu, zo wjedźetej Trudla Malinkowa a Jurij Łušćanski zajimcow sobotu 21.9.24 w 15.00hodź. k rowam serbskich wótčincow na Tuchorskim kěrchowje. Dale budźe 3.10.w 16.oo hodź. swjatočne zarjadowanje k wopomnjeću Jana Awgusta Měrćinka před jeho ródnym domom w Hrodźišću, kiž je zamohł rěč inuitow přełožować a z tutych přičin w lětach 1850 do 1853 na łódźi "investigator" sobu wotkrył sewjerozapadnu pasažu, tak je so krótši puć namakał a njebě w přichodźe wjace trěbne, z łódźu Južnu a Sewjernu Ameriku wobkružić.

Sylwija Jancyna jako hłowny hósć wotmołwi potom we formje interviewa ze županku na wšelakore prašenja. Ludźi zajimowaše, zwotkel pochadźa, kak sej herbstwo sławneje Nawkec swójby zachowa, kak so čuje jako dołholětna spěwarka w chórje Budyšin. Wosebje pak w interviewje wuzběhnje, kak w jeje swójskej Měšćanskej apotece dźěła, wšako je tuta historiska hižo z 16. lětstotka a je  w Budyšinje přewšo znata a woblubowana . A nic naposledk powěda wo nastaću a wuwiću apotecyneje zahrodki při murjach Michałskeje cyrkwje. Přispomni tež, zo so přeco wjace ludźi zajimuje za přirodne lěki a hojenske zela, tak rjec za alternatiwnu medicinu.

Potom dońdźechmy wšitcy do zahrodki a Sylwija Jancyna rozkładźe wulki dźěl jeje rostlinkow a za čo abo přećiwo čemu wone skutkuja. To je za čitarjow dobry pokiw za přichodne wuchodźowanje po Budyšinje, njech sej tutu rjanu zahrodu wjele ludźi wobhlada. Připódla prajene, kóždy smě sej ruku połnu zelow wotšćipać! Rjane dwurěčne tafle z pomjenjomaj a QRcodom pomhaja, zo by so kóždy móhł sam wobhonić a to abo tamne stwjelco sej wobstarać a z tym strowoće tyć.

županka Leńka Thomasowa