Pod nawodom społnomócnjeneho zwjazkoweho knježerstwa za prašenja wusydlencow a narodne mjeńšiny dr. Bernda Fabritiusa wuradźowaše 19. nowembra w Čornym Chołmcu poradźowacy wuběrk za prašenja serbskeho luda. Na posedźenju wobdźělichu so jako zastupjerjo serbskeho luda ze stron Domowiny předsyda Dawid Statnik, městopředsydaj Marko Hančik a Wylem Janhoefer. Załožbu za serbski lud zastupowaštaj předsydka załožboweje rady Susann Šenkec a direktor Jan Budar.Zakład zetkanja tworješe rozprawa předsydy Domowiny k połoženju serbskeho ludu. Nimo posudka aktualnych wuwićow na polu rěčneho spěchowanja, prawniskich ramikow a situacije serbskeje rěče, naspomni předsyda tež wažne temy přichodneho časa. Tak wospjetowachu zastupjerjo Serbow próstwu, w ramiku přichodneho finančneho zrěčenja finančny zakład załožby za serbski lud widźomnje zwyšić. Statnik k tomu: “Do přichoda je wažne, zo wobkedźbuja so při spěchowanju tež nowe wužadanja kaž digitalizacija, potrjeba dalšich poskitkow spěchowanja rěčnych rumow a regionalizacija poskitkow”.Wulki dźěl zabra rozprawa wo dźěle z młodźinu a dorostom. Zastupowaca wjednica serbskeho studija MDR a zdobom wjednica radija Satkula Andreja Chěžcyna rysowaše, kak sćelak so prócuje wo dorost a młodym Serbowkam a Serbam zbliži dźěławosć žurnalistiskich powołanjow. Krajnej społnomócnjenej za strukturnu změnu Łužicy dr. Stephan Rohde (Sakska) a dr. Klaus Freytag (Braniborska) informowaštaj wo aktualnym stawje nastupajo zakonja k zmócnjenju struktury (Strukturstärkungsgesetz). Přitomni běchu sebi přezjedni, zo maja so serbske temy při strukturnej změnje wobkedźbować.Statnik k tomu: “Za Serbow njeje strukturna změna jeničce prašenje dźěłowych městnow, ale wosebje tež móžnosćow, regionalnu identitu a serbsku rěč skrućić. Škoda, kotraž je so serbskemu ludej přez lěta trajace wudobywanje a z tym zwjazane zničenje sydlenskeho ruma načiniła, ma so při wuwiću struktury wobkedźbować.”Dalše temy běchu mjez druhim dwurěčnosć taflow při awtodróhach, prawo wužiwanja žónskich mjenow we wupokazach a ratifikowanje ILO-konwencije 169.Dawid Statnik pokaza na to: “W serbskich medijach je so rozprawjało, zo je kanclerski hamt so pječa za ratifikaciju ILO-konwencije a z tym připóznaće Serbow jako indigeny lud wuprajił. Pozdatnje njewotpowěduje tole połnej wěrnosći. Drje ma so ILO-konwencija po koaliciskim zrěčenju wobjednawać, připóznaće Serbow jako indigeny lud pak njeje předwidźane. Němske knježerstwo poćahuje so při tym na prawniske posudźowanje konwencije.”Nimo zastupjerjow krajow Sakska a Braniborska so zapósłancy Zwjazkoweho sejma Torsten Herbst (FDP), Stephan Kühn (Zwjazk 90/Zeleni) a Karsten Hilse (AfD) wobdźělichu.