Předsyda Domowiny Dawid Statnik je Hodźijskemu fararjej Christofej Rummelej k jeho přichodnemu zastojnstwu serbskeho superintendenta gratulował. Rummel, kiž je w Rudnych horinach wotrostł a serbsce nawuknył, budźe lětsa w lěću Jana Malinka naslědować, kiž so potom na wuměnk poda. Statnik přeje Rummelej „bohate Bože žohnowanje za wukonjenje tuteje wosebiteje funkcije. Runja nam Serbam je Waše pomjenowanje wulke wjeselo, wšako móžemy nětko z toho wuchadźeć, zo budźeće ze spomóžnej dźěławosću dotalneho serbskeho superintendenta Jana Malinka w tutym zastojnstwje pokročować.”W tutym zwisku předsyda Domowina na to skedźbni, zo třěšny zwjazk po swojich wustawkach wuraznje nabožne aktiwity Serbow podpěruje, wšako stej w Serbach hustodosć wěrywuznaće a narodne wědomje wusce zwjazanej. Dawid Statnik: „Serbscy superintendenća skutkuja kaž rěčna swětłownja w ewangelskich Serbach. Hladajo na zwjeselacy rozrost serbowanja w ewangelskim wosadnym žiwjenju po cyłej Łužicy je wažne, zo maja angažowani serbscy wěriwi dale spušćomneho podpěraćela a reprezentanta swojich specifiskich zajimow.”