Prezidij Domowiny je jednohłósnje namjetował, dobu za zapodaće kandidaturow ze Sakskeje za přichodnu wólbnu periodu załožboweje rady hač do kónca nowembra podlešić. Dotal je so pjeć kandidatow přizjewiło, pytani pak su znajmjeńša wosmjo, zo bychu wšě městna štyrjoch rjadnych a štyrjoch zastupowacych serbskich čłonow ze Sakskeje wobsadźić móhli. Wólby chcedźa na wurjadnym posedźenju zwjazkoweho předsydstwa (ZP) 13. januara 2023 přewjesć. Wo tym tuchwilu hišće zwjazkowe předsydstwo we wokolnym wothłosowanju rozsudźi. Dotalni załožbowi radźićeljo změja na wuradźowanju ZP w Serbskim ludowym ansamblu 25.11. składnosć, wo swojej dźěławosći rozprawjeć. 

Zastupjer Serbow w rozhłosowej radźe RBB budźe tež w dobje 2023-2027 Marcus Końcaŕ, jednaćel Domowiny z Delnjeje Łužicy. Prezidij je srjedu wječor (9.11.) w mjenje zwjazkoweho předsydstwa namjet předsydstwa župy Dolna Łužyca wobkrućił. Nimo toho je so prezidij z planom posedźenjow gremijow Domowiny a  hospodarskim planom zaběrał. Zwjazkowe předsydstwo ma na swojim posedźenju 25.11. klětušu hłownu zhromadźiznu zwołać, prezidij namjetuje jako termin 22. apryla w Choćebuzu.

Dalša tema běše přiměrjenje jednanskeho porjada prezidija a zwjazkoweho předsydstwa nowym wustawkam třěšneho zwjazka, kotrež je lětuša wurjadna hłowna zhromadźizna doskónčnje wobzamknyła. Tule dźe wosebje wo konkretne aspekty digitalneho wobdźělenja čłonow gremijow, kotremuž su w nowych wustawkach tež njewotwisnje wot pandemije puć rubali. Wotpowědny namjet prezidij zwjazkowemu předsydstwu sposrědkuje.

Tež mjezynarodnemu folklornemu festiwalej Łužica 2023 je so prezidij wěnował a namjet šěsć wosobow za přihotowanski wuběrk zdźěłał, wo kotrymž ma zwjazkowe předsydstwo rozsudźić.

Na kóncu posedźenja podźakowa so předsyda Dawid Statnik w mjenje čłonow prezidija referentej Marcelej Braumanej za dobre sobudźěło w gremiju. Wón wopušći ke kóncej měsaca zarjad Domowiny a nastupi funkciju šefredaktora Serbskich Nowin. Za to přeja jemu čłonojo gremija wjele wuspěcha.