Srjedu wječor je so prěni raz w času koronakrizy prezidij Domowiny regularnje we Wojerecach schadźował. W mjezyčasu je so gremij wo aktualnych prašenjach we wokolnych wothłosowanjach doruzumił. Trěšny zwjazk chce zašłe tydźenje přestorčene zarjadowanja nětko krok po kroku nachwatać, přichodne posedźenje zwjazkoweho předsydstwa ma so 19. junija přewjesć. Tuchwilu su župy, čłonske towarstwa a zwjazki namołwjene, namjety za změny wustawkow zapodać, wo kotrychž změje klětuša hłowna zhromadźizna doskónčnje rozsudźić. Domowina budźe njedźelu, 10. meje, před pomnikom w Chrósćicach na 75. róčnicu wozrodźenje třěšneho zwjazka po wójnje spominać – ze swjatočnosću na naměsće při Wjeselic statoku na Hórnikowej 25 w 10.30 hodź. Zajimcy su wutrobnje witani. Domowinski zarjad a župa „Michał Hórnik” na to skedźbnjatej, zo maja přitomni mjezsobny wotstawk 1,5 m dodźeržeć a po tuchwilu płaćacych postajenjach za zhromadźizny ze zakryćom huby a nosa na městnje přebywać. Prezidij so dale z wotewrjenymi mjeńšinopolitiskimi prašenjemi zaběraše, předsyda Domowiny Dawid Statnik informowaše mjez druhim wo prócowanju nastupajo wobkedźbowanje rěčow awtochtonych a regionalnych rěčow při online-komunikaciji wobydlerjow ze zarjadami. Tu so Domowina zhromadnje z Mjeńšinowej radu za to zasadźuje, zo steja zarjadniske formulary digitalnje tež na přikład serbsce k dispoziciji, štož by rěčnej charće EU wotpowědowało.