Předsydstwo župy „Handrij Zejler” Wojerecy je lětušu schadźowanku za swójby ze sto a połsta ludźimi w Kulowje jako wuspěšnu wuhódnoćiło, klětu chcedźa na druhim městnje zaso tajke zarjadowanje w nazymniku přewjesć. Składnostnje 100. róčnicy załoženja wotnožki Serbskeje ludoweje banki we Wojerecach w lěće 1922 předstaji Werner Sroka koncepciju přenjeje stacije puća serbskich stawiznow „Via Sorabica Hoywoj”. Na fasadźe twarjenja w starym měsće ma so foto domu z tehdomnišim napismom „Serbska ludowa banka – Wendische Volksbank” připrawić. Cyły historiski puć ma klětu w kooperaciji župy z městom nastać. Dotal předleža z pjera Wernera Sroki ideje za 14 stacijow.

Přichodna „Rěčna swětłownja” so 15.12. hromadźe z wobdźělnikami rěčnych kursow wotměje. Za klětu planuje župa kubłansku jězbu do domu Měrćina Nowaka-Njechorńskeho, a wopyt župneho předsydstwa pola wjesnych towarstwow.