Domowina so čěskim přećelam Serbow towarstwa „Societas Amicuum Liberec” (SAL) zjawnje za pokročowanje Serbskeho kulturneho lěta njedźiwajcy přiwótřeneje korona-krizy dźakuje. Clemens Škoda, referent třěšneho zwjazka Serbow za kulturne naležnosće a wukraj: „Zo bu najebać pandemiju wustajeńca Maje Nagloweje natwarjena, bě hižo kedźbyhódny wukon. Wězo so hromadźe nadźijamy, zo budźe hišće wernisaža móžna. Za kulisami dźěła SAL zaměrnje na dalšimaj projektomaj z Budyskim Serbskim muzejom: čěskoserbski audio-video-guide za dźěći a brošurku wo Serbach a Łužicy. Tež wustajeńcu z fotami Maćija Bulanka w bibliotece w Liberecu přihotuja, wona ma so po móžnosći klětu w februaru zahajić. Smy našim swěrnym partneram kaž Janje Vančatovej jara dźakowni, zo su z njesměrnej prócu pokročowanje Serbskeho kulturneho lěta w času pandemije zmóžnili. So wě, zo je so runja našim kulturnišćam tež w Liberecu wjele wupadnyło a přestorčiło. Ale samo na přetorhnjenu seriju přednoškow wo nas w Semilech, Českej Lípje a Turnově chcedźa tak spěšnje kaž móžno zaso nawjazać. Tohodla prošu wšěch zajimcow we Łužicy: Hdyž budźe zaso čas wolóženjow, potom podajće so prošu w bohatej ličbje na zarjadowanja přećelow Serbow w Liberecu! Tłóčmy SAL palcy, zo woni z nami tuchwilne brěmjo přetraja, zo bychmy zaso zwučenu wuměnu dale wjesć móhli.”