K dźensnišemu spožčenju zwjazkoweho zasłužboweho křiža Bjarnatej Cyžej, něhdyšemu jednaćelej Domowiny (1992-2016), wiceprezidentej Federalistiskeje unije europskich narodnych mjeńšin FUEN (2013-2019) a wot 2004 čłonej mjeńšinoweje rady, so Judit Šołćina, nawodnica mjeńšinoweho sekretariata a designowana jednaćelka Domowiny, wupraja:

„Bjarnat Cyž njeběše ženje jenož ,powołanski Serb’: Jeho hłowno- a čestnohamtski angažement twori cyłk, kiž je lětdźesatki dołho jeho cyłe žiwjenje formował. Hłós Bjarnata Cyža ma na najwšelakoriše wašnje wuznam: jako rěčnik, bjesadowar a spěwar. Wón je cyłe kongresy politisce kaž kulturnje wobohaćał.

Jeho zhromadne wuznamjenjenje ze Saterskim Frizom Karlom-Peterom Schrammom je wosebje rjane znamjo njepowalneho prócowanja Bjarnata Cyža wo spušćomnu kooperaciju a dowěrliwu mjezsobnosć narodnych mjeńšin. Wjeselimy so, zo steji Bjarnat Cyž nam dale ze swojimi bohatymi nazhonjenjemi k dispoziji, na přikład jako čestnohamtski čłon mjeńšinoweje rady a přichodnje zaso jako zastupjer Serbow w rozhłosowej radźe MDR.

Wažimy sej a česćimy Bjarnata Cyža jako profilowaneho posoła serbskeho ludu blisko a daloko. Ze swojim wótrym rozumom je wón hustodosć tež tym k hłubšemu přemyslowanju dopomhał, kotřiž njejsu so w diskusiji jeho poziciji přizamknyli. Zwjazkowy minister nutřkowneho mytuje serbskeho demokrata, kiž je w najnowšich serbsko-němskich stawiznach swoje slědy zawostajił.

Domowina Bjarnatej Cyžej nanajwutrobnišo gratuluje.”