Serbowka spěchuje turizm w Sakskej ze serbskej mnohotnosću
Dźensa wopyta Sakska statna ministerka za kulturu a turizm, Barbara Klepsch, na přeprošenje zapósłanca Sakskeho krajneho sejma Marka Šimana město Budyšin. We wobłuku jeje wopyta zetka so wona z mějićelku Wjelbika Moniku Lukašowu a šefkucharjom Tomašom Lukašom, kaž tež z předsydu Domowiny, Dawidom Statnikom, kaž tež referentom za hospodarske a infrastrukturelne naležnosće Pětrom Brězanom, zo by wo turistiskej praksy a wuznamje dwurěčnosće w turizmje zhoniła. Přewodźała je ministerku dr. Madlena Malinkec, społnomócnjena za naležnosće Serbow statneho ministerstwa za wědomosć, kulturu a turizm.
Monika Lukašowa je dźěl tuchwilneje turistiskeje kampanje “Turizm: słodźi. Pola nas w Sakskej” Sakskeho statneho ministerstwa za wědomosć, kulturu a turizm. „Mnozy hosćo su mje hižo na kampanju narěčeli, a mam začuće, zo stej wotewrjenosć a zajim za našu serbsku kulturu přiběrałoj. Witam tajke kampanje, kotrež k widźomnosći regiona přinošuja.“, wuzběhny jednaćelka Wjelbika a pósłanča turizma Monika Lukašowa.
Referent Domowiny Pětr Brězan chwaleše angažement korčmarki. Dale pokaza tohorunja na wažnosć widźomnosće serbšćiny. K tomu wón wuwjedźe, zo dźěła Domowina tuchwilu na hospodarskim myće, kotrež ma serbske iniciatiwy w hospodarskich předewzaćach hódnoćić.
„Smy hordźi na to, zo Monika a Tomas Lukašec serbsku kulturu a rěč přez swoje dźěło do zjawnosće njesetej. Wonaj přinošujetaj k tomu, zo so naša rěč a kultura přeco bóle jako dźěl sakskeje normality zaznawa“, hódnoći předsyda Domowiny Dawid Statnik.
Foto (Domowina/Božena Šimanec): Witanje z chlěbom a selu: pósłanča turizma a mějićelka Wjelbika Monika Lukašowa, šefkuchar Wjelbika Tomaš Lukaš, referent za hospodarske a infrastrukturelne naležnosće Pětr Brězan, zapósłanc Sakskeho krajneho sejma Marko Šiman, předsyda Domowiny Dawid Statnik, statna ministerka za za kulturu a turizm Barbara Klepsch (wotlěwa).
Comments and Responses
Božena Šimanec/Schiemann
nowinska rěčnica/
casnikarska powědaŕka/
Pressesprecherin
Domowina z. t./
Domowina – Bund Lausitzer Sorben e. V.
tel.: 03591 / 550 202
Be the First to Comment