Po zakónčenju a wuličenju listowych wólbow ma Serbske šulske towarstwo (SŠT) nowe předsydstwo. K tomu so předsyda Domowiny, Dawid Statnik, wupraja:„Wjeselu so, zo je so Serbskemu šulskemu towarstwu radźiło, pod wurjadnymi wuměnjenjemi pandemije nowe předsydstwo wolić. Gratuluju wšěm wolenym: předsydce Katharinje Jurkowej, kaž tež čłonam předsydstwa Jenifer Dünnbierowej, Romanej Grzybej, Alenje Hiccynej, Benej Hoyerej, Janej Rjedźe a Dianje Wowčerjowej a přeju jim wjele zboža a wjele wuspěcha do přichoda. Zdobom so dotalnej dołholětnej předsydce Ludmili Budarjowej za lětdźesatki spomóžneho angažementa na dobro serbskeho kubłanja dźakuju. Zo móže SŠT nětkole z nowej generaciju na čole pokročować, je tež jeje zasłužba.SŠT je tradicionelnje jara profilowane nadregionalne fachowe towarstwo na polu kubłanja, kotrež ma za serbski lud bytostny wuznam. Tohodla je třěšnemu zwjazkej wažne, zo wostawa SŠT sylny hłós w narodnej organizaciji. Stejimy hromadźe před wulkim wužadanjom, w kooperaciji ze staršimi, kubłarjemi a wučerjemi rěčne rumy w kubłanišćach a jako wupłód jich wšědneje dźěławosće skrućeć a rozšěrjeć. Při tym dyrbjeli so mocy a kompetency zjimać. Tohodla so nadźijam tež dobreho zhromadneho dźěła Rěčneho centruma WITAJ (RCW) a Serbskeho šulskeho towarstwa.”Foto: Ludmila Budarjowa, dotalna předsydka SŠT; Katharina Jurkowa, nowa předsydka SŠT; Dawid Statnik, předsyda Domowiny (w.l.)https://www.sorbischer-schulverein.de/hshttps://www.sorbischer-schulverein.de/ds