Dawid Statnik, předsyda Domowiny, so k dlěšemu rańšemu programej Serbskeho rozhłosa MDR wupraja:Wot dźensnišeho mamy rano jednu hodźinu wjac Serbskeho rozhłosa MDR Sakskeje. To je kročel do praweho směra. Domowina je so wjele lět za wjac wusyłanskeho časa serbskeho programa zasadźowała. Z programom mjez 8 a 9 hodź. je wjac ludźom móžno, rano serbski rozhłós poskać. Nětk sej jako přichodnu kročel wospjetowanje rańšeho programa cyły dźeń na DAB+ žadamy. To móže so z wuchadźišćom za serbski kanal stać. Dokelž chcemy wězo dołhodobnje serbski program rozhłosa a telewizije kóždy čas měć – runja němskim poskitkam.My so wjeselimy, zo serbski rozhłós zdobom ofensiwnje wo nowych sobudźěłaćerjow wabi. Dokelž njeje serbski kanal jenož prašenje pjenjez, ale dosć personala. Tohodla je kubłanje a wukubłanje młodych ludźi, kotřiž so za medije horja, na wysokim maćernorěčnym niwowje najwjetše aktualne wužadanje. Jako Zwjazk Łužiskich Serbow smy zamołwići, so wo to starać, zo so potrjebje serbskeho ludu tež na polu zjawnoprawniskich medijow wotpowěduje.