LEAG je swój koncept za brunicowy rewěr předźěłał a wozjewił: Prožym wotbagrować nochcedźa, ale Miłoraz. K tomu so Dawid Statnik, předsyda Domowiny, wupraja:„Zwjeselace za nas wězo je, zo maja w Prožymje skónčnje wěstotu, w swojej domiznje wostać směć a ju dale wuwiwać móc. To je tež z boka serbskeho ludu dobra powěsć, wšako w Prožymje a wokolinach serbske naležnosće wědomje pěstuja.Zrudźaca powěsć je, zo je koncern njedźiwajcy wobzamknjeneho wustupa ze zmilinenja brunicy při tym wostał, Miłoraz wotbagrować chcyć. Budźe jim zawěsće ćežko, hladajo na kónc wudobywanja brunicy za poł lětdźesatka swój rozsud zjawnosći wujasnić, wjesku dewastěrować, kotraž ma lětstotki dołho serbsku tradiciju. Wězo je nam wědome, zo je mjez wobydlerjemi Miłoraza wšelakich měnjenjow. Tohodla njech ći, kotřiž chcedźa so wobćežowanjam bliskeje brunicoweje jamy wuwinyć a do Slepoho přećahnyć, dale wotpowědnu podpěru dóstawaja. A zdobom smy wězo solidarni z tymi, kotřiž Miłoraz wopušćić nochcedźa.”