Marcel Brauman budźe wot 1. januara 2020 nowy nowinski rěčnik a referent za zjawnostne dźěło Domowiny. W samsnej funkciji dźěła wón z lěta 2000 za frakciju Lěwicy w Sakskim krajnym sejmje. Marcel Brauman narodźi so 1963 w Hamburgu a přisłušeše tři lěta katolskemu rjadej “misionarow z Mariannhilla”. Wobšěrne powołanske nazhonjenja zběraše mjez druhim jako swobodny žurnalist, reporter a nawoda redakcijow we Würzburgu a Berlinje, jako awtor dalšich publikacijow a jako blogowar Piwarc. Wobšěrne su jeho čestnohamtske aktiwity w Serbach: M. Brauman je čłon zwjazkoweho předsydstwa a prezidija Domowiny, předsyda kubłanskeho wuběrka a z lěta 2018 župan župy Wojerecy; nimo toho dołholětny čłon Maćicy Serbskeje, Towarstwa Cyrila a Metoda a Towaršnosće za spěchowanje Serbskeho ludoweho ansambla.“Smy so za Marcela rozsudźili, dokelž wažimy sej jeho kompetencu, kreatiwnosć a angažement runje na polu nowych medijow. Wjeselimy so na dobre zhromadne dźěło a přejemy našemu nowemu koleze wjele wuspěcha”, praji jednaćel Domowiny Marko Kowar dźensa w Budyšinje.Dotalna nowinska rěčnica poda so kónc lěta na wuměnk. Domowina bě městno tohodla w lěću wupisała.