Předsydstwo župy „Handrij Zejler“ Wojerecy a zastupjerjo župy „Delnja Łužicy“ su wčera popołdnju w bróžni domu Domowiny we Wojerecach wo zhromadnych wužadanjach wuradźowali. Wojerowska ko-županka Gabriela Linakowa witaše susodneho župana dr. Pětša Šurmana, jednaćela Domowiny z Delnjeje Łužicy, Marcusa Końcarja, a regionalnu rěčnicu Heike Apeltowu. Linakowa zwurazni, zo chcedźa „jako geografisce centralna župa mostotwarcy mjez Hornjej a Delnjej Łužicu“ być. Hłowna tema zetkanja běše wuměna nazhonjenjow na polu rěčneho kubłanja, wšako je we woběmaj regionomaj poměrnje mało maćernorěčnych Serbow. Tohodla su so wo nowych pućach za wozrodźenje rěče rozmołwjeli. Wupłód projekta „Zorja“ w Dešnje na přikład je, kaž Šurman informowaše, zo budźetej dwě třećinje wobdźělnikow prěnjeho kursa w serbskich institucijach dźěłać. Župje chcetej z wuměnu pokročować.