Do lětušeho posedźenja poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho pósćele Domowina nimo předsydy Dawida Statnika a městopředsydow dr. Hartmuta Leipnera a Marka Hančika dweju młodostneju z Delnjeje Łužicy a chce so wo tym z předsydstwom župy „Dolna Łužyca” dorozumić. To je prezidij Domowiny wutoru, 5.7., wobzamknył. Zdobom je gremij přihot wólbow serbskich zastupjerjow rady Załožby za serbski lud za wólbnu periodu 2023-27 zahajił, kotrež budu na dnjowym porjedźe zwjazkoweho předsydstwa 25. nowembra stać. 

Prezidij je kónčne wotličenje za institucionelne spěchowanje Domowiny, RCW a konkretnych zaměrow lěta 2021 rozjimał. Regionalne rěčnicy, referenća a jednaćelej zastupowachu třěšny zwjazk hłowno- a čestnohamtsce w 106 stajnych resp. nachwilnych gremijach wot komunalneje hač do mjezynarodneje runiny a w šulskich konferencach Sakskeje a Braniborskeje. Móžna nowela Sakskeho serbskeho zakonja je prezidij znowa zaběrała. Po njedawnym wuradźowanju prawniskeho wuběrka chcedźa nětko na zetkanje a dorozumjenje mjez prezidjom, wuběrkom a Radu za serbske naležnosće w swobodnym staće Sakskej přeprosyć.

Přichodna zhromadźizna delegatow FUEN so 1. oktobra w Berlinje wotměje. Domowina skutkuje prawidłownje w třoch dźěłowych skupinach třěšneho zwjazka awtochtonych narodnych mjeńšin Europskeje a je jedna z najaktiwinišich čłonskich organizacijow.