Z wulkim wjeselom je prezidij Domowiny na wědomje brał, zo buštaj čłonaj serbskeho młodźinskeho towarstwa PAWK, Felicia Touvenot a Krystof Grofa, kiž je zdobom ze sobustawom zwjazkoweho předsydstwa, zašły kónc tydźenja do předsydstwa Młodźiny europskich narodnych skupin (MENS) wolenaj. Hižo přichodny tydźeń budźe dalši mjezynarodny wjeršk, zetkanje dźěłoweje skupiny FUEN „Non-Kin-State” w friziskim Dagebüllu/Doogebelu (18.11.-20.11.), prezidij je jako zastupjerja Domowiny referenta za hospodarske a infrastrukturelne naležnosće, Pětra Brězana, delegował.

Na přichodnych posedźenjach zwjazkoweho předsydstwa (ZP) a prezidija Domowiny maja so wšitcy wobdźělnicy – čłonojo a přistajeni – na městnje na koronu testować dać. Nimo toho płaći kaž tuchwilu w Sakskej při tajkich zarjadowanjach „2G”, to rěka, zo móža so nješćěpjeni jeničce digitalnje wobdźěleć. Na to je so prezidij srjedu wječor na hybridnym wuradźowanju dojednał – postajenje płaći za čas incidency nad 35.

Prezidij je přichodne posedźenje zwjazkoweho předsydstwa přihotował, kotrež so 19. nowembra na žurli Budyskeho Serbskeho domu wotměje. Woni změja mjez druhim wobsadźenje wuběrkow a zahajenje jich dźěławosće za wólbnu periodu 2021-2025 a zrjadowanje zamołwitosćow za zwoprawdźenje dźěłowych směrnicow postajić, kotrež je hłowna zhromadźizna wobzamknyła. Tež naćisk noweho jednanskeho porjada ZP a jeho prezidija steji na dnjowym porjedźe.

Po wobšěrnej diskusiji je prezidij stejišćo k spěchowanskimaj směrnicomaj Załožby za serbski lud nastupajo wužiwanje srědkow za změnu strukturow na zakładźe zwjazkoweho zakonjedawarstwa schwalił. Z wida třěšneho zwjazka dyrbja so srědki hłownje za tworjenje přidatnych rěčnych rumow inwestować a při tym měli zastupjerjo serbskeje bazy we wšěch regionach sobu rozsudźić.  Wažne je prezidijej tež, zo spěchowanje dlěšodobne zasadźowanje personala zmóžnja.