21. wurědna głowna zgromaźina Domowiny jo se pětk, 3. smažnika, we Wuměłskej hali Łužyca w Chóśebuzu wuspěšnje dokóńcyła. Wóna bu na pórucenje cłonkojskich towaristwow a župow zwołana. Jadnučka tema jo była změna wustawkow Domowiny. Na łońskej głownej zgromaźinje wobzamknjone změny wustawkow njejsu se wót amtskego sudnistwa pśipóznali. Toś jo zwězkowe pśedsedaŕstwo pśeźěłanu pśedłogu pśedpołožyło. Ten jo wopśimjeł naraźenja, kótarež su se na trjebnych městnach wuzamóžnili.

Hynac ako howac pśewjeźo se ta wurědna zgromaźina jano w małem krejzu. Mimo 30 cłonkow zwězkowego pśedsedaŕstwa pśepšosyjo Domowina stawnje jadnu zastupnicu / jadnogo zastupnika cłonkojskego towaristwa abo župy. Jadnaŕka Judit Šołćina k tomu: „Pśigóty głowneje zgromaźiny smy južo w januarje zachopili. Tak smy tencas z cłonkojskimi towaristwami a župami wó móžnem klucu delegatow wuraźowali. Glědajucy na tencas hyšći wobstojece wobgranicowanja pandemije dla, su se wšykne za pómjeńšony kluc delegatow rozsuźili. Wjaselimy se źinsa, až mamy góźbu zgromaźinu na městnje pśewjasć a tak lěpšu wuměnu měnjenjow zmóžniś”.

Pśedsedaŕ Domowiny, Dawid Statnik, jo rozpominał z pomocu prezentacije pśedłogu pšawniski trjebnych změnow wustawkow, z kótarymiž jo musała wurědna głowna zgromaźina pokazki Drježdźańskego zastojnstwowego sudnistwa wótpowědowaś, aby na póslednjej głownej zgromaźinje wobzamknjone nowe wustawki płaśiwosć dojśpili. Zrownju su se teke tśi naraźenja wobglědowali, kótarež su se w ramiku zjawneje diskusije zapódali.
Pśedpołožona pśedłoga jo wuslědk mjasece trajucego źěłowego procesa cłonkojskich towaristwow a župow, pšawniskego wuběrka Domowiny, prezidiuma a Zwězkowego pśedsedaŕstwa Domowiny.

Slědujuca diskusija jo była žywa a pokazujo, až su se delegatki a delegaty intensiwnje z pśedłogu zaběrali. Mimo wopśimjeśowych pšašanjow a pokazkow su se teke měnjenja zasadnego charaktera pśednjasli. Ako wuslědk diskusije su schwalili 39 delegaty z wětšynu změnjone naraźenje wustawkow. Zastojnstwo Domowiny ma změny něnto amtskemu sudnistwu a financnemu amtoju pśedpołožyś. Pśiwzeli amt změny, su wustawki płaśece.
Statnik pó zarědowanju: “Wjaselim se, až smy zgromadnje zamógli naše wustawki na změnjone pótrjeby źinsajšnego casa wusměriś. Tak mamy něnto moderne rědowanje za źěło gremijow, teke za pad dalšnego móžnego pókšacowanja pandemije. Pótom móžomy pósejźenja teke hybridnje abo digitalnje pśewjasć. Wjaselim se teke, až su se delegatki a delegaty tak intensiwnje do procesa zapśěgnuli. Žywu diskusiju pógódnośujom ako znamje aktiwnego kšywowego zwězka, w kótaremž jo móžno, wšake naglědy, měnjenja a intencije mjazy sobu wótwórjone wuměnjaś.

Pódłožki pósejźenja su w górnoserbšćinje, dolnoserbšćinje a nimšćinje na internetowem boku Domowiny pśistupne: https://www.domowina.de/hsb/domowina/hlowna-zhromadzizna/translate-to-hsb-21-hauptversammlung-2022

Zajimcy su mógali zgromaźinje teke pśez YouTube-kanal Domowiny slědowaś. Link jo dalej pśistupny pód youtu.be/MmdAXQTK1-E.

Zarědowanim jo se pśizamknuł w 19 góź. na samskem městnje wótwórjenje wustajeńce „Serbske wuměłce a Serby we wuměłstwje ”, na kótaruž su byli wšykne delegaty a gósći głowneje zgromaźiny wutšobnje pśepšosone.

Wósebna wustajeńca pórucyjo wót 4. junija sem doglěd do wuměłskego twórjenja serbskich a dalšnych wuměłcow. Dłujki cas su se zwobraznili serbske motiwy a temy we wuměłstwje z wiźenja tśeśich. Idyliske žywjenje na jsy, Błota, drastwy a nałogi, wósebna póbóžnosć – wjele nimskich wuměłcow jo to pśiśěgnuło. Z někotarymi wuwześami móžomy wó wutwórjenju samostatnego serbskego twórjecego wuměłstwa akle z rozmachom serbskego narodnego gibanja pó prědnej swětowej wójnje powědaś.

Aktualna wustajeńca zjadnośijo wobej boka. Wiźeś su serbske mólarje 20. stolěśow ako Fryco Latk, Alfred Janigk, Conrad Felixmüller a Jurij Hajna/Georg Heine ako teke nacasne wuměłce Iris Brankačkowa, Hella Stoletzki abo Jan Buk. Grafiki Adolfa Burgera a Alberta Kretschmera ako teke mólby A. Junghansa, Karla Hensela a Bertholda Genzmera pósrědnjaju wiźenje nimskich wuměłcow na serbski žywjeński swět. Mimo źěłow z priwatneje Chóśebuskeje zběrki su póžyconki Chóśebuskego Serbskego muzeja a z priwatneje ruki we wustajeńcy wiźeś.