Kubłanje wóstanjo centralna temaStyri tyźenje do 19. głowneje zgromaźiny, dnja 5, měrca, stej wótegroniłej pśedsedaŕ Domowiny Dawid Statnik a Marcus Końcaŕ, zastupujucy jadnaŕ Domowiny, w Chóśebuzu na casnikarskem rozgronje Domowiny na pšašanja žurnalistow.19. głowna zgromaźinaDnja 30. měrca zejźo w Chróśćicach něźi 190 delegatow ze wšych župow a cłonkojskich towaristwow Domowiny k 19. głownej zgromaźinje Domowiny. Ako cesne góśći su se mjazy drugim pśizjawili sakski ministaŕski prezident Michael Kretschmer, cłonk Zwězkowego sejma dr. Klaus-Peter Schulze a społnomócnjony zwězkowego kněžarstwa za pšašanja wusedlarjow a narodne mjeńšyny dr. Bernd Fabritius.„Na połojcy legislaturnehe periody buźomy tam našo doněntajšne źěło bilancěrowaś a nowe źěłowe směrnice za dobu až do 20. głowneje a wólbneje zgromaźiny 2021 pśiwześ“, groni pśedsedaŕ Domowiny. W swójej rozpšawje co se wón wósebnje pśiwobrośiś źełabnosći kšywowego zwězka, aktualnym a nowym politiskim wupominanjam a aktiwitam cłonkojskich cełkow. Dalšne informacije wó źěle zwězkowego pśedaŕstwa, župow a towaristwow w zajźonyma lětoma se w delegatnej mapje wózjawiju.W pśedłoze nowych źěłowych směrnicow za dobu wót 2019 do 2021 naraźijo zwězkowe pśedsedaŕstwo na pśikład, až pśewjeźo Domowina diskusiju k jeje wustawkam: Zaměry a struktury Domowiny, rědowanje cłonkojstwa, juristiske zastupowanje kšywowego zwězka a dalšne pšašanja maju se w organach Domowiny a ze župami ako teke z cłonkojskimi towaristwami/zwězkami diskutěrowaś, aby nastała pśedłoga za nowelěrowanje wustawkow Domowiny. Dalšny dypk pótrjefijo wuscejšy zwisk gremijow k bazy Domowiny, Domowinskim kupkam a towaristwam. Toś to wótcakowanje jo se jawiło we łoni wót Domowiny pśewjeźonem napšašowanju wšych serbskich towaristwow a zwězkow. Dr. Judith Jahn z Lipska, kenž jo napšašowanje wugódnośiła, buźo na głownej zgromaźinje hyšći raz głowne wuslědki pśedstajaś.Teke źiwanje na serbske zajmy w procesu strukturneje změny we Łužycy buźo wažny wopśimjeśowy dypk na głownej zgromaźinje. Jo pśedwiźone, až pśedsedaŕ wuběrka za góspodarstwo a turizm, Marko Kliman łońšu strukturnu konferencu Domowiny wugódnośijo a na konkluzije za dalšne póstupowanje Domowiny pokazujo.Dalej pśiwobrośijo se na pšosbu młoźinskeje pśirady wósebny dypk dnjowego porěda głowneje zgromaźiny pśedstajenju serbskeho młoźinskego gibanja w Górnjej Łužycy.A nic naslědku pśiwzejo se towaristwo z Łuchowa/Lüchow (Wendland) – Wendischer Freundes- und Arbeitskreis e. V. – dokóncnje ako asociěrowany cłonk Domowiny.Domowina ma něhdźe 7.400 čłonow. Woni su w 5 župach a w 13 nadregionalnych specifiskich towarstwach organizowani.KubłanjeLipsćański Institut za sorabistiku jo w nadawku Krajneho instituta za šulu a medije Barliń-Bramborska (LISUM) pśewjadł ewaluaciju Witaj-kubłanja w Dolnej Łužycy. Njedawno wózjawjone wuslědki su młogich znjeměrnili. Głowna zgromaźina župy Dolna Łužyca dnja 1. februara jo togodla wobzamknuła, až ma so lětosa pśewjasć kubłańska klawsura. Zwězkowe pśedsedaŕstwo Domowiny jo to na swójom posejźenju dnja 15. februara w Budyšynje wobkšuśiło a pśiwzeło. Rěcny centrum WITAJ kubłańsku klawsura w tej chyli pśigótujo. Wona wótmějo se dnja 10. apryla w Chóśebuzu. Zastupniki serbskich institucijow budu tam trjebne politiske kšaceni a napšawy za Dolnu Łužycu diskutěrowaś, kwalificěrowaś a na tom samem dnju wótgłosowaś. Wóni twórje zakład dalšneho póstupowanja na politiskem polu.Teke w Górnej Łužycy jo kubłanje wažna tema. Tak jo župa „Jan Arnošt Smoler“ Budyšyn na swójej lětosnej głownej zgromaźinje wobzamknuła, naraźiś 19. hłownej zgromaźinje Domowiny, aby póstarcyła „ewaluaciju wucby serbšćiny w nejšyršom zmysle w serbskem sedleńskem rumje, aby se wucba serbšćiny za kužde źiśe na wusokem niwowje dalej zarucyła.“Mjazynarodny folklorny festiwalWót 4. do 7. julija witaju w Budyšynje, Hochozy a Chrósćicach wugótowarjow a gósći XIII. Mjazynarodnego folklorneho festiwala „Łužyca“. Pó pśeśěgu pó Budyšynje stwórtk wótpołdnjo wótmějo se wjacor wótwórjeński program w Nimsko-Serbskem ludowem źiwadle. Lubowarje mjazynarodneje kultury ludow směju se zasej na wjele pśechwatanjow wjaseliś. Pśigronili su na pśikład kupce z Peru a Boliwiskeje, kupka z Nepala, kenž prezentěrujo program swójogo imaterielneho kulturneho derbstwa ako teke gósći z Algeriskeje a Japanskeje a se wě dalšne ansamble z Europy. Mjaz nimi su kupki „Harrukern“ z Hungorskeje, cełk z Pólskeje a młoźinski orchester z pólskeho partnerskeho města Lesnica, kenž pśewjeźo w casu festiwala probowe lěgwo w Hórkach a Chrósćicach.Wósym cełkow z Górneje, srjejźneje a Dolneje Łužyce pokazujo swóje programy w Budyšynje, Hochozy a Chrósćicach. „Wósebnosć w Hochozy je za młogich luźi familijowa atmosfera. Dwóry su mjeńše ako na pśikład w Chrósćicach, pśez což su gósći wuměłcam wó wjele bliže“, groni Marcus Końcaŕ. Teke w Hochozy změju zasej regionalne chłošćonki na pśedań a ako zakóncenje jo wšym kazane na zgromadne reje z kapału nAund.Za program „W raju wjasołych źiśi“ sobotu wótpołdnja w Chrósćicach pśedlažy pśigótowańskemu wuběrkoju 11 pśizjawjenjow, mjaz nimi su kupki z Brětnje a Slěpego, serbske zakładne šule Chrósćicy, Worklecy a Ralbicy, źiśeca kupka towaristwa „Stup dale“ z Drježdźan a „Łužycanka“.Festiwalne finale wótmějo se pó zwuconej wašni njeźelu wótpołdnja w Chrósćicach.