Hłowna zhromadźizna

Dwě njedźeli do 19. hłowneje zhromadźizny Domowiny zeńdźe so zwjazkoweho předsydstwo pod nawodom předsydy Domowiny Dawida Statnika dnja 15. měrca wječor w Chrósćicachk swojemu 11. rjadnemu posedźenju. Cyłkowne přihoty “hłowneje” leža w planje, delegatne mapy so tuchwilu rozdźěla a tež simultany přełožk je skazany. Delegaća hłowneje zhromadźizny wuradźuja dnja 30. měrca wot 9 hodź. we wjacezaměrowej hali “Jednota” w Chrósćicach, Hórnikowa dróha 34. Zhromadźizna je zjawna. Swoje wobdźělenje připrajiłoj staj mjez druhim społnomócnjeny zwjazkoweho knježerstwa za prašenja wusydlencow a narodne mjeńšiny dr. Bernd Fabritius a sakski ministerski prezident Michael Kretschmer.

Zarjad Domowiny a Rěčny centrum WITAJ

Zwjazkowe předsydstwo wza rozprawje zarjada Domowiny a Rěčneho centruma WITAJ (RCW) wo jeju lońšej dźěławosći na wědomje a schwali tohorunja jeju lětušej planaj. Wone dźakowaše so přistajenym za jich dobre dźěło.Zakład za ćežišćowe nadawki zarjada w lěće 2019 tworja program a dźěłowe směrnicy Domowiny kaž tež dalše wobzamknjenja zwjazkoweho předsydstwa. Jedyn wjeršk dźěławosće RCW budźe premjera noweho synchronizowaneho filma “Syn Winnetouwa” 31. měrca w Chróšćanskej „Jednoće“. Nowosće budźetej dale wobrazowy słownik z digitalnym bookii słuchopisakom a delnjoserbski digitalny wučbny srědk “Kšac pó kšacu & prawopis a gramatika”. Zwjazkowe předsydstwo wobzamkny nimo hižo do plana zapisanych nadawkow, zo ma RCW nastajić a wjesć běžnu statistiku wo ličbje Witaj-dźěći we Witaj-pěstowarnjach, wo ličbje šulerjow, kiž wobdźěla so na wučbje serbšćiny kaž tež wo ličbje šulerjow, kiž wobdźěla so na cuzorěčnej wučbje serbšćiny. Zwjazkowe předsydstwo a župa Delnja Łužica prosytej wo prawidłowne informacije wo tutej statistice. Pozadk toho je starosć, zo po wozjewjenju wostrózbnjacych wuslědkow ewaluacije Witaj-wučby w Delnjej Łužicy starši swoje dźěći wotzjewja. Za Hornju Łužicu namjetowaše zwjazkowe předsydstwo, organizować zetkanje nawodow wšěch serbskich šulow k wuměnje nazhonjenjow a nastorčenje diskursa.

Młodźinske towarstwo Serbska Murja

Dale předstajištaj předsyda Pětr Dźisławk a pokładnik Florian Kießlich młodźinske towarstwo Serbska Murja. Wone je so před třomi lětami załožiło a ma 13 čłonow w starobje wot 18 do 21 lět ze wšěch kónčin Hornjeje Łužicy. Jich wulki projekt je digitalny kwis “QuizSerb”, kiž stajnje rozšěrjeja. Zwjazkowe předsydstwo namjetowaše, jón tež do delnjoserbšćiny přełožić dać. W swojich wustawkach maja serbšćinu jako wobchadnu rěč zapisanu. Jich přichodne zarjadowanje budźe dnja 27. apryla spěwny wječork w Jaseńcy. Towarstwo chce bórze Zwjazkej serbskich studowacych − župje “Jan Skala” přistupić.

Čłonow wólbneho wuběrka Braniborskeje serbskeje rady wolili

Jako čłonow wólbneho wuběrka za wólby Rady za naležnosće Serbow při Braniborskim krajnym sejmje powoła zwjazkowe předsydstwo swojeho čłona Kita Elu kaž tež Sylku Laubensteinowu-Poleńcojc, Jörga Maznika a Měta Nowaka. Lisćina móže so dale wudospołnić. Wólby přewjedu so lětsa za wólbnu dobu 2019 – 2024.

Pómjenowanje cłonkow wólbnego wuběrka za wólby Rady za nastupnosći Serbow pśi Bramborskem krajnem sejmje, pśedłoga co. ZP 68/2019:

Na zakłaźe wólbnego pórěda k Serbskej kazni Bramborskeje § 6 wótstawk 1 pśigłosujo Zwězkowe pśedsedarstwo Domowiny ako nejwušy gremij pśipóznatego serbskego kšywowego zwězka pó § 4a Serbskeje kazni Bramborskeje wót Župy Dolna Łužyca z. t. naraźonej zestawje wólbnego wuběrka za wólby Rady za nastupnosći Serbow pśi Krajnem sejmje Bramborskeje na dobu 2019-2024.

Zwězkowe pśedsedarstwo pówołajo do toś teje cesnoamtskeje funkcije slědujuce wósoby: Kito Ela, Sylka Laubensteinowa-Poleńcojc, Jörg Maznik, Měto Nowak.

Lisćina móžo se dalej wudopołniś.

Namołwa župam a towarstwam, so na sakskim wubědźowanju idejow wobdźělić

Sakske knježerstwo je wupisało idejowe wubědźowanje k spěchowanju strukturneje změny. Nadrobnosće ke kriterijam, terminam a mytam su wozjewjene na web-stronje https://www.mitmachfonds-sachsen.de, kotraž so w přichodnych dnjach tež w serbskim přełožku wozjewi. Wosebita kategorija wěnuje so temje „Łužica – žiwa dwurěčnosć“. Za jury tuteje kategorije pomjenowa zwjazkowe předsydstwo štyrjoch Serbow a Serbowkow, a to Manfreda Hermaša za Župu Jakub Lorenc-Zalěski z. t., Sonju Hrjehorjowu za župu „Handrij Zejler“ Wojerecy, Wendelina Brězana za župu „Michał Hórnik“ Kamjenc a Leńku Thomasowu za župu „Jan Arnošt Smoler“ Budyšin. Jury za tutu kategoriju přisłušatej dale předsydka Sakskeje serbskeje rady Marja Michałkowa a jedyn zastupjer Załožby za serbski lud. Zwjazkowe předsydstwo namołwja župy a towarstwa, so ze swojimi idejemi a projektami na wubědźowanju wobdźělić. Štóž trjeba pomoc při požadanju, móže so na zarjad Domowiny w Budyšinje wobroćić, praji jednaćel Marko Kowar. Dale ma Domowina jedne městno w nadrjadowanej jury za łužiski brunicowy rewěr; rozsud wo tym delegowaše zwjazkowe předsydstwo do prezidija.

Słowjansku flanku na europskej runinje zdźeržeć

Čłon zwjazkoweho předsydstwa Bjarnat Cyž poda rozprawu wo swojim skutkowanju jako wiceprezident Federalistiskeje unije europskich narodnosćow (FUEN) we wólbnej dobje 2016-2019. Gremij wza rozprawu na wědomje a wupraji jemu dźak a připóznaće za lěta dołhe spomóžne skutkowanje w FUEN-prezidiju, w kotrymž je wón wosebje zajimy słowjanskich mjeńšinow sylnje zastupował. K lětušim wólbam noweho prezidija B. Cyž hižo njekandiduje, přihotuje pak hišće sobu lětuši FUEN-seminar słowjanskich mjeńšin. Čłonka prezidija zwjazkoweho předsydstwa Judit Šołćina wabješe za to, zo bychu so Serbja a Serbowki na tutym polu dale angažowali, zo by so “słowjanska flanka na europskej runinje zdźeržała”. Zwjazkowe předsydstwo Domowiny namołwja župy a towarstwa, zo bychu tež za funkcije na europskej runinje kandidatow namjetowali a přijimuje jich namjety. Jedyn z hłownych nadawkow při tym budźe zaměry iniciatiwy Minority SafePack za mnohotu Europy přesadźić, za kotruž su tež Łužiscy Serbja mnoho podpismow zběrali.