Přihoty přichodneho posedźenja Zwjazkoweho předsydstwa Domowiny stejachu w srjedźišću wuradźowanja jeho prezidija dnja 31.08.2016 we Wojerecach.

Mjez druhim wobjednachu čłonojo prezidija namjet namakanskeje komisije, kiž poda rozprawu druheho wupisanja wo městno jednaćelki/jednaćela Domowiny, na kotrež su so wjacori požadali. Rozsud wo powołanju do pozicije twori Zwjazkowe předsydstwo Domowiny.

Dale přihotowachu namjet za wotběh 18. hłowneje zhromadźizny Domowiny, na kotrejž ma so dźěławosć nětčišeje legislatiwy wuhódnoćić a maja so nowi čłonojo do gremijow třěšneho zwjazka wolić.

Na wědomje wza prezidij 28 stejišćow Domowiny, kotrež zapodachu so nastupajo próstwy wo zwěsćenje přisłušnosće komunow k serbskemu sydlenskemu teritorijej w Braniborskej. Tute wudźěłachu so na namjet župy Delnjeje Łužicy.

Přichodne posedźenje zwjazkoweho předsydstwa wotměje so dnja 17.09.2016 w Choćebuzu – zajimcy su wutrobnje witani. 18. hłowna a wólbna zhromadźizna Domowiny schadźuje so dnja 25. měrca 2017 we Wojerecach.