Přihoty přichodneho posedźenja Zwjazkoweho předsydstwa Domowiny stejachu w srjedźišću zetkanja prezidija Domowiny dnja 19.06.2018 we Wojerecach.Tež wuhódnoćichu čłonojo njedawne słyšenje k serbskim naležnosćam w Sakskim krajnym sejmje, kotrež přewjedźeše so 11.06.2018. Na słyšenju wobdźěli so tež čłon Serbskeje rady a předsyda Domowiny Dawid Statnik. “Zjawne posedźenje wuběrka je zmóžniło widźomnje wo situaciji serbskeho ludu rozprawjeć. Naprašowanja stronow su pokazali, zo je połoženje serbskeho ludu aktualny tema za wšitke strony krajneho sejma. Witamy, bychu-li dalše zarjadowanja tajkeho razu slědowali. Je to nowa forma transparentneje demokratije”, tak Statnik po posedźenju prezidija.Čłonojo prezidija Domowiny witachu zdźělenku prezidenta krajneho sejma Sakskeje, zo chcedźa serbski napis na Krajnym sejmje připrawić. Zdobom wuprajichu wočakowanje, zo měł serbski napis po wulkosći a pismje samsny němskemu być. “Runohódnosć, kajkaž ju Sakska wustawa žada, měła měritko być.”, tak Statnik.Dale informowaše so prezidij wo planowanym zarjadowanju “Rozmołwa ze Saksami” (Sachsengespräch), na kotrež přeprošujetaj ministerski prezident Sakskeje Michael Kretschmer a předsyda Domowiny Dawid Statnik. Zarjadowanje budźe dnja 04.07.2018 w 19:00 hodź. w Serbskim domje w Budyšinje. Ministerski prezident a zastupnicy krajneho knježerstwa poskića so k rozmołwje wo wšěm, štož Serbow jima a što měło so změnić. Zajimcy su wutrobnje přeprošeni.Přichodne posedźenje Zwjazkoweho předsydstwa Domowiny wotměje so 29.06.2018 w Rownom. Přichodne posedźenje prezidija Domowiny wotměje so 15.08.2018 we Wojerecach.