Dnja 14.11.2018 zetka so prezidij Zwjazkoweho předsydstwa Domowiny we Wojerecach. Na posedźenju dorozumi so prezidij na slědowace stejišćo k wozjewjenej rozprawje komisije “Rozrost, strukturna změna, dźěło”:Komisija “Rozrost, strukturna změna, dźěło” (brunicowa komisija) je 25.10.2018 wozjewiła mjezyrozprawu. Tam so mjez druhim zwěsći, zo je so serbski lud přez wudobywanje brunicy we łužiskim rewěrje wosebje poćežił a zo měješe to wulke wuskutki na prócowanja Serbow k zachowanju swojeje kultury a identity – a my dodamy: serbskeje rěče. Tohodla měła so tutej temje při postajenju přichodneho wuwića wosebita kedźbnosć wěnować. Dale rěka w mjezyrozprawje: “To zapřija we łužiskim rewěrje spěchowanje kultury a identity serbskeje mjeńšiny.”“My wočakujemy”, praji předsyda Domowiny Dawid Statnik na posedźenju prezidija 14.11.2018, “zo krajej Sakska a Braniborska wuwijetej za cyłotnu Łužicu struktury, kiž so na dobro žiwjenja našich wnučkow we Łužicy wuskutkuja. Za to chcemy so rady z angažementom a wěcywustojnosću gratu přimać.” Domowina wočakuje, zo dóstanu nimo wokrjesow tež komunalni zastupjerjo Sakskeje a Braniborskeje Łužicy kaž tež zastupjerjo serbskeho ludu městno a hłós při zwoprawdźenju planow a předstawow za wuwiće w přichodnych lětdźesatkach. Z projektom Dźěłarnička přichod Łužica je so prěni a wažny krok do směra činił, zo so cyła Łužica, kaž tež Serbja wobdźěla. Zajimy jednotliwcow njesmědźa so tu nad měru wobkedźbować. Hižo srjedź septembra stej Dźěłarnička přichod Łužica a Domowina w Złym Komorowje konferencu “QUO VADIS ŁUŽICA – přichod łužiskich Serbow” přewjedłoj. Wažne dypki běchu konkretne wočakowanja wobydlerjow, zo by Łužica přichod měła a so jako žiwjenjahódna wuwiła. Kooperacija ze susodnymi krajemi we wuchodźe, róla so nawróćacych abo atraktiwita poskitkow za młodostnych – to su temy, kotrež maja za přichod serbskeho ludu wosebity wuznam. Trěbne njejsu jeničce programy za inwesticije do dźěłowych městnow, ale cyłotny wid, zo by so identita a wosebitosć dwurěčneje Łužicy zachowała. Wočiwidnje je Łužica predestinowana, so na europski region kompetency za wjacerěčnosć a mnohotnosć rěčow wuwić; to měli my sylnišo wužiwać a wuzběhnyć. Přichodne posedźenje prezidija Domowiny wotměje so 05.12.2018. Zwjazkowe předsydstwo Domowiny wuradźuje dnja 14.12.2018 w Chrósćicach.