Zastupjerjo Domowiny w šulskich konferencach serbskich kubłanišćow resp. šulow ze serbskim poskitkom w Sakskej su so wutoru popołdnju na žurli Serbskeho domu w Budyšinje zešli. Katrin Suchec-Dźisławkowa, referentka Domowiny za kubłanje a dorost, je dohlad do prawniskeho zakłada w Sakskim šulskim zakonju dała a wočakowanja na skutkownosć „serbskeje prezency” w šulskich konferencach sformulowała. Wažne je, „so słowa jimać a serbske temy narěčeć”, k tomu słušeja nastorki za šulske wjednistwo hladajo na profilowanje serbskosće w šuli a n.př. na internetnej stronje.

Rezimej diskusije běše, zo chcedźa hač do kónca januara 2022 po župach a regionach serbskorěčne projekty za cyłodnjowske poskitki šulow a za pućowanske dny hromadźić a zestajeć. Tomu so zetkanja w mjeńšich regionalnych skupinach přizamknu. Při tym ma so tež mjezsobna wuměna zesylnjeć. Kubłanska referentka je nadawk přewzała, na zakładźe tuteje wuměny informacijow přehlad wšěch serbskich poskitkow organizować. Zdobom budźe wona zastupjerjow w šulskich konferencach prawidłownje z wokolnikom wo wšěch relewantnych powšitkownokubłanskich naležnosćach informować. Za kónc šulskeho lěta 2021/22 je přichodne zetkanje wšěch zastupjerjow planowane.

Katrin Suchec-Dźisławkowa, kotraž tute zhromadne dźěło koordinuje: „Nochcemy sej jenož žadać, ale chcemy konkretnu podpěru šulam při serbskich naležnosćach sposrědkować. Situacija na šulach a we wšelakich regionach je dosć rozdźělna, na to mamy so sensibelnje nastajeć, kubłanišćam w jich specifiskej situaciji poboku być. K tomu słušeja tež po potrjebje rozmołwy ze šulskimi wjednistwami. Nimo zastupjerjow w šulskich konferencach su tež regionalne rěčnicy wažne partnerki w našej syći na dobro serbskosć na šulach. Dźensniše zetkanje běše takrjec nowy započatk. Smy wězo kóždy čas wotewrjeni pokiwam ludźi, kotřiž so za serbske kubłanje horja.”