Pjatk, 25.3., wječor je so zwjazkowe předsydstwo Domowiny w Serbskim kulturnym centrumje w Slepom schadźowało, połojca wobdźělnikow běše digitalnje z posedźenjom zwjazana. Prěni raz za čas pandemije móžachu zajimcy posedźenje nimo livestreama tež na městnje sćěhować, tule móžnosć wužiwaše direktor wyšeje šule w Slepom, Jan Hrjehor.

Jan Kral informowaše wo dźěławosći Serwisoweho běrowa za serbšćinu w Sakskej, kiž je w nošerstwje Domowiny a komunam serbskeho sydlenskeho ruma wosebje ze zeserbšćenjom zarjadniskich tekstow poboku. Při tym staj sobudźěłaćerjej Franciska Grajcarekec a Jan Kral tež nowy serbski słowoskład wotkryłoj. Nimale wšitke gmejny su so hižo na běrow we Wojerecach wobroćili, kiž je ze serbskeho komunalneho programa Sakskeje financowany. 

Předstajenje nowych přełožowanskich funkcijow w Microsoft-aplikacijach je online-postrow Thomasa Langkabela, National Technology Officer Microsofta w Němskej, zahajił. Beata Brězanowa, nawodnica Rěčneho centruma Witaj, pokaza mjez druhim, kak móžeš na přikład přez word-program jendźelski tekst do serbšćiny přełožić. Składnostnje lětušeho mjezynarodneho dnja maćeršćiny je Microsoft hornjoserbšćinu do swojeho Bing-translatora zapřijał. W internej testowej werziji přełožowanskeho programa „sotra” je tež delnjoserbšćina integrowana. Hdyž budźe to zdokonjane, chcedźa korpus delnjoserbšćiny Microsoftej přepodać, zo byštej wobě serbšćinje z wobstatkom Bing-translatora byłoj.

Wurjadna hłowna zhromadźizna móhła so hladajo na wolóženje korona-postajenjow snadź tola w prezency přewjesć, praješe předsyda Domowiny, Dawid Statnik. Hač do meje chcedźa wotpowědujo pokiwam Drježdźanskeho hamtskeho sudnistwa loni wobzamknjene změny wustawkow třěšneho zwjazka prawnisce přiměrić.

Dalša tema běše rěčne kubłanje: Projekt za rewitalizaciju delnjoserbšćiny „Zorja” je ze swojej dźěłarničku z Arapaho-Indianom prof. Neyooxetom Greymorningom hižo wažne dopóznaća za cyłu Łužicu přinjesł. Metoda dospołneje imersije je po měnjenju sobuiniciatora Maksimiliana Hasackeho tež za dorosćenych wulki postup. Tomu je so Beata Brězanowa přizamknyła a poruča, tež wosebje njemaćernorěčnym šulerjam na šulach zmóžnjeć, sej serbšćinje najprjedy rěčo a bjesadujo přiswojić, prjedy hač pisać dyrbja. Marek Krawc, docent Rěčneho centruma Witaj za dorosćenych, kiž podawa tuchwilu 15 kursow w Pančicach-Kukowje, Budyšinje, Slepom a Wojerecach, dźěła tohorunja z wobrazami a elementami imersije, kaž je wón čłonam zwjazkoweho předsydstwa rozkładł. Jemu leži tworjenje nowych rěčnych rumow ze swojimi kursami na wutrobje. 

Změna strukturow je zwjazkowe předsydstwo znowa zaběrała. Załožbowy direktor Jan Budar informowaše powšitkownje wo wotběhu přizwolenjow z wotpowědneho spěchowanskeho programa a wo stawje natwara Lawskeho areala w Budyšinje. 15.3. su so z kulturnym wuběrkom Domowiny wothłosowali, tež dźěłarnička załožby, Serbskeho instituta a Serbskeho muzeja je so wotměła. 24. meje ma so załožbowa rada zaso naležnosći wěnować. Zdobom je Budar architekturne wubědźowanje připowědźił. Domowina chce, tak Dawid Statnik, ramikowe požadanje za spěchowanski program „serbska rěč a kultura w času strukturneje změny” hač do 31.3. sčasom zapodać. Jednaćelka Judit Šołćina je na to skedźbniła, zo dźe při tym prěnjotnje wo přiswojenje rěče we wšelakich regionach. Zamołwity wuběrk za naležnosće změny strukturow, hospodarstwo a infrastrukturu je w tutym zwisku zašły pjatk wuměnu ze serbskimi institucijemi moderował.

Jako fachowcow do wuběrkow zwjazkoweho předsydstwa je gremij sćěhowace wosoby powołał: Ludwiga Elu do wuběrka za nutřkownu demokratiju a serbsku ciwilnu towaršnosć, Guida Budarja a Fabiana Jacobsa do wuběrka za naležnosće změny strukturow, hospodarstwo a infrastrukturu.