Dźensa je předsyda Domowiny, Dawid Statnik, zhromadnje z předsydu Towarstwa Cyrila a Metoda, Jurjom Špitankom, w Budyskim Serbskim domje Praskeho arcybiskopa, kardinala Dominika Duku, swjećaceju biskopow Zdeneka Wasserbauera a Václava Maleho, podpisar a – runja Václavej Havelej – rěčnik „Charta 77“, a dźesać čěskich bohosłowcow na rozmołwu powitał. Kardinal Duka je čěski primas. Skupina přebywa tři dny na priwatnej jězbje w Serbach. Kardinal je zhromadnosće na přikład w česćowanju swjateju Cyrila a Metoda wuzběhnył, předsyda Domowiny praješe: „Přeco hdyž su Serbja problemy měli, su Češa pomhali” – na přikład ze serbskim wuwučowanjom za serbske dźěći po druhej swětowej wójnje w namjeznej kónčinje.Dawid Statnik, předsyda Domowiny, so k tomu wupraja: „Nam Serbam je to wulke wjeselo, zo najwyši katolski duchowny našeho partnerskeho kraja Čěskeje nas hižo druhi raz wopyta. Dźakujemy so Towarstwu přećelow Serbow w Praze, Společnost přátel Lužice (SPL), kotřiž w Praze kaž „serbski konsulat“ skutkuja, Towarstwu Cyrila a Metoda a wšěm pomocnikam za podpěru. Je wjele dobrych tradicionelnych stykow do Čech, hač putnikowanja do Krupki abo prawidłowne zarjadowanja w Serbskim seminarje w čěskej stolicy. Ćim bóle so wjeselimy, hdyž přećeljo Serbow ze susodneho kraja do serbskeje Łužicy přińdu. To njech je nam wšěm sylny pohon, swoje zwiski ze słowjanskimi susodami w zmysle jedneje Europy a hranicy přesahowaceje Łužicy hišće intensiwnišo pěstować.” Foto: Předsyda Domowiny, Dawid Statnik, a Jurij Špitank, předsyda Towarstwa Cyrila a Metoda (TCM), staj na žurli Serbskeho domu w Budyšinje čěškemu kardinalej Duce serbske swjate pismo a informacije wo Serbach přepodałoj. Foto: Domowina