Předsyda Domowiny, Dawid Statnik, a amtěrowaca županka župy „Jan Arnošt Smoler”, Hilža Mehrowa, staj štwórtk, 31.3., w Budyšinje čestnemu čłonej třěšneho zwjazka, Janej Bartej, k 90. narodninam gratulowałoj. Statnik hódnoćeše wusahowacu skutkownosć jubilara za serbski lud:

„Jan Bart, wunamakar projekta Witaj, je nowej načasnej metodźe za wožiwjenje serbšćiny po cyłej Łužicy puć rubał. Před nimale štwórć lětstotkom je so prěnja Witaj-pěstowarnja w Choćebuzu wutworiła. Jan Bart je system dospołneje imersije z bretoniskeho projekta rewitalizacije rěče ,Diwan’ k nam přinjesł.

Štož je so pola nas 1998 oficielnje w kubłanišćach za předšulske dźěći započało, chcedźa entuziasća nětko z projektom ,Zorja’ – znowa wuchadźejo z Choćebuza – we wobłuku procesa změny strukturow z młodymi dorosćenymi nałožować. Zaměr je, zo woni zaso swójby załoža, kotrež serbšćinu přichodnej generaciji na přirodne wašnje dale sposrědkuja.

Z tym projekt ,Zorja’ dospołnje tomu wotpowěduje, štož je Jan Bart z projektom ,Witaj’ stajnje wuzběhował: Bjeze swójbow žadyn model wuspěšny njebudźe. Trjebamy rumy w priwatnym a zjawnym žiwjenju, w kotrychž so serbuje, zo njeby ,Witaj’ eksperimentelna pedagogiska kupička wostała. Z projektom ,Zorja’ bywa ,dźěćo’ Jana Barta, ,Witaj’, dorosćene.

Dźakujemy so jubilarej za jeho wusahowacy, puć rubacy a njesebičny angažement za byće a traće serbskeho ludu po cyłej Łužicy. Přejemy jemu strowotu a dale mocow dosć, zo móhł podźěl brać na našim prócowanju za wožiwjenje serbšćiny. Nadźijamy so dale jeho spomóžnych pokiwow a impulsow w kritiskich diskusijach wo polěpšenju serbskeho kubłanja.”

Tež nawodnica Rěčneho centruma WITAJ (RCW), Beata Brězanowa, je Janej Bartej w mjenje wšěch sobudźěłaćerjow RCW wosobinsce gratulowała:

„Přejemy Wam wjele zboža k 90. narodninam, Bože žohnowanje, strowotu a nadal wćipnosć na zajimawosće žiwjenja. Wobdźiwamy, kak intensiwnje wuwiće Witaj-projekta stajnje slědujeće a konstruktiwnje komentujeće. Smy Wam dźakowni za wšitke Waše pokiwy. Zhromadnje ze Serbskim šulskim towarstwom chcemy so nětko hišće zaměrnišo staršim wěnować. Projektowa ideja za noworěčnikow dale zrawi a měła so za Hornju, srjedźnu a Delnju Łužicu cyłkownje zwoprawdźić.”

Wobraz: Dawid Statnik je Janej Bartej koš połny witaminow přepodał. Foto: Domowina/Marcel Brauman