Župa „Jan Arnošt Smoler” Budyšin skedźbnja składnostnje 100. posmjertnych narodnin serbskeho informatikarja prof. Dr. Mikławša Joachima Wićaza (narodźeny 15.3.1921 w Kamjenej pola Radworja, zemrěł 1998 w Drježdźanach) na wažne podawki spominanja. Wjeseli so, zo stej pod aktualnymi wuměnjenjemi poskitkaj online a w rozhłosu, z kotrymajž móže so wjele ludźi z nim zeznajomić. Předsydstwo župy Budyšin budźe, ručež situacija pandemije dowoli, na našeho wuznamneho krajana Mikławša Joachima Wićaza při jeho rowje w Drježdźanach-Strěžinje spominać. Słowa spominanja přednjesu bywša nawodnica Serbskeho gymnazija Rejza Šěnowa a druzy. Na spominanje sławneho krajana budu zajimcy a česćowarjo z Łužicy a Drježdźanscy Serbja přeprošeni. Mikławš Joachim Wićaz je wusahowacy přikład za doprědkarske techniske ideje, kotrež su z našeho ludu wušli. Wón je tež w Drježdźanach rady z hosćimi z Łužicy serbował, kaž je Jurij Nuk w Protyce 2014 w nastawku „Wo nestoru a pioněru mašinelneje ličenskeje techniki w NDR” wobswědčił. Njedźelu, dnja 14. měrca, wot 14.00 do 15.30 hodź. spomina na Wićaza Wojerowski kompjuterowy muzej Konrada Zusy. Titul je „N. J. Lehmann 100 - anekdoty & wobrazy k 100. narodninam wuchodnoněmskeho pioněra kompjuterow“. Je to bjezpłatne „online-zarjadowanje“ https://zuse-computer-museum.com/angebote/veranstaltungen/Přizjewjenje tule: BZ - ZCOM - virtuelle Museumsführung "Lehmann 100" (edudip.com)We wabjenju wo Wićazu mj. dr. rěka: „Husto jeho Zusu wuchoda mjenuja. Wot 1956 běše Wićaz direktor Instituta za mašinelnu ličensku techniku na TU Drježdźany a wojowaše tam wo připóznaće kompjutera jako techniski nastroj přichoda. Online-wodźenje (...) rozjasnja, čehodla móžemy jeho tež tworićela prěnjeho PC swěta mjenować.” To piše nawodnica Wojerowskeho muzeja. Konrad Zuse běše z M. J. Wićazom spřećeleny, štož so nic naposledk z tym wobkruća, zo je Zuse portretaj M. J. Wićaza molował. Jedyn z portretow našeho krajana je we Wojerowskej wustajeńcy widźeć. Renoměrowany hobbyjowy historikar a awtor wjacorych knihow wo Drježdźanskich stawiznach, Christoph Pötzsch, serbskeho IT-pioněra M. J. Wićaza we wusyłanju MDR 1 radio Sakska póndźelu, 15.3., mjez 15 a 15.30 hodź. w rozmołwje šěršej zjawnosći předstaji. Pötzsch: „Zawěsće słuša prof. dr. Mikławš Joachim Wićaz k najwuznamnišim informatikarjam NDR. W zažnych 60. lětach wuwi model blidoweho kompjutera we wulkosći ,cigaroweje tyzy’, kotryž měł po jeho planje na pisanskim blidźe kóždeho inženjera stać. Njepředstajomna wizija. NDRske instancy su tomu jako ,njezmysłej, kiž ći włosy na hłowje stawać da’, zadźěwali.”