Kaž je Zwjazkowy hamt za kartografiju a geodeziju dnja 16.11.2021 na Twitter zdźělił, chce stajny wuběrk za geografiske pomjenowanja Zwjazkowemu ministerstwu za wobchad namjet předpołožić, tafle na awtodróhach we Sydlenskim rumje Serbow w přichodźe dwurěčnje, němsce a serbsce, pomjenować. Namjet ma so podać, ručež je so nowe Zwjazkowe knježerstwo wutworiło. Tomu předchadźało je lěta trajace prócowanje Domowiny. Mjez druhim je rěčnica měła móžnosć, we wuběrku wo naležnosći přednošować.

Stajny wuběrk za geografiske pomjenowanja  (StAGN) doporuči, spěchuje a wudźěła regule za jednotne wužiwanje geografiskich pomjenowanjow. Wuběrk je přiwjazany na Zwjazkowy hamt za kartografiju a geodeziju w Frankobrodźe nad Mohanom.

Dawid Statnik, předsyda Domowiny: “Witamy rozsud wuběrka. Je to za nas wažny mjezyschodźenk na puću do normality dwurěčneje Łužicy. Njeje to hišće doskónčny rozsud ale pokazka do praweho směra.”

Prašenje dwurěčneho wutaflowanja awtodróhow bě tež wobstatk wólbnych kopolakow Domowiny k Zwjazkowym wólbam 2021. SPD je so za wutaflowanje wuprajiła, ručež so spěšnosć na awtodróhach na 130 km/h wobmjezuje. FDP je zdźěliła, zo so za aktiwne rěčne spěchowanje a zjawnu dwurěčnosć zasadźa. Zeleni su so tohorunja pozitiwnje wuprajili a su mjez druhim připowědźili, so dale za předźěłanje směrnicy RWBA 2000 zasadźować, kotraž wutaflowanje na awtodrohach rjaduje.

Link na powěsć

https://twitter.com/BKG_Bund/status/1460557206223527938?ref_src=twsrc%5Etfw%7Ctwcamp%5Etweetembed%7Ctwterm%5E1460557206223527938%7Ctwgr%5E%7Ctwcon%5Es1_c10&ref_url=https%3A%2F%2Fpublish.twitter.com%2F%3Fquery%3Dhttps3A2F2Ftwitter.com2FBKG_Bund2Fstatus2F1460557206223527938widget%3DTweet

Link na StAGN

https://www.stagn.de/DE/Home/home_node.html

Wólbne kopolaki Domowiny

https://domowina.blog/2021/09/23/wolbne-kopolaki-wahlprufsteine-ii-awtodrohi-a-dwurecnosc-zweisprachigkeit-an-autobahnen/