Sakski krajny sejm je jako prěni třoch zamołwitych parlamentow nowemu statnemu zrěčenju wo MDR přihłosował. Z tym dachu zapósłancy w Drježdźanach tež noworjadowanju zelenu swěcu, kotrež stat Sakska wosebje nastupa: prěni raz zawjazowace zastupnistwo serbskeho ludu w rozhłosowej radźe MDR. K tomu rozłožuje Dawid Statnik, předsyda Domowiny: „Z tym je bolostny njedostatk při wobdźělenju serbskeho ludu na rozsudach, kotrež nas nastupaja, po dołholětnym prócowanju wotstronjeny. Runje dokelž serbski program w MDR swoje krute městno a wysoku akceptancu w serbskorěčnej ludnosći ma, je rozsud dawno na rjedźe.Widźimy MDR jako wažneho partnera při perspektiwje 24-hodźinskeho / 7-dnjowskeho poskitka w serbskej rěči, při čimž su nam nowe digitalne techniki poboku. Spěchowanje a zdobywanje rěčnje kwalifikowaneho dorosta žurnalistow budźe nas při tym jako wulke zhromadne wužadanje přewodźeć. Dźakujemy so tym, kotřiž su tutón rozsud sobu přihotowali, podpěrowali a tworili. Smy na zakładźe politiskich předznamješkow dobreje mysle, zo sejmaj w Erfurće a Magdeburgu na kóncu runje tak rozsudźitej.Domowina je jako zakonsce připóznate zastupnistwo zajimow serbskeho ludu za pomjenowanje wosoby zamołwita, kotraž budźe přichodnje serbske naležnosće w rozhłosowej radźe zastupować. My swoju namołwu zajimcam wobkrućamy, so jako kandidaća a kandidatki přizjewić (na sekretariat@domowina.de). Naše zwjazkowe předsydstwo ma jako najwyši stajny gremij třěšneho zwjazka něhdźe 200 serbskich skupin, towarstwow a zwjazkow wólby přewjesć. Postajenje terminow budźe po doskónčnym wobzamknjenju statneho zrěčenja a přichadźe oficialneje zdźělenki.”