Wjeršk klětušeho „Lěta Zejlerja a Kocora“ budźe „serbski spěwanski swjedźeń” sobotu wječor, 29. winowca/okotobra 2022, w Budyskej „Krónje”. Wuměłski nawoda swjedźenja, Friedemann Böhme, je njedawno w mjenje přihotowanskeho wuběrka wšitke serbske chóry Delnjeje, srjedźneje a Hornjeje Łužicy z listom přeprosył. Spěwne ćělesa móža so hač do 25. oktobra pisomnje přizjewić. Swjatočne zarjadowanje nawjazuje na prěni serbski spěwanski swjedźeń w oktobrje 1845 w Budyšinje pod nawodom Korle Awgusta Kocora. Tehdy bu dźensniša hymna „Rjana Łužica” z tekstom Handrija Zejlerja a z hudźbu Kocora prapředstajena.

Njedźelu, 30.10.2022, w 17 hodź. so k tomu nutrnosć/nyšpor za spominanje w Budyskej tachantskej cyrkwi wotměje. Tež na tón podawk su chóry wutrobnje přeprošene. Nimo kěrlušow a modlitwow zaklinči tam tež hudźba za dwoje pišćele jako wosebitosć w tutej cyrkwi.

Štóž so na swjedźenju wobdźěli, dóstanje notowy zešiwk ze wšitkimi twórbami, kotrež na swjedźenju zaklinča, zo bychu móhli je w běhu lěta nazwučować. Při tym so wosebita pomoc poskićuje: Friedemann Böhme a Judith Kubicec staj chóram dwaj abo tři razy při probach w nalěću resp. lěću 2022 poboku, jeli wone to chcedźa. Planowany je swjedźeń za někak 300 wobdźělnikow. Dźe wo to, „našeju wuznamneju předchadnikow a nas samych swjećić.” Pasiwne wobdźělenje jako publikum njeje předwidźane, projekt na iniciatiwu Zwjazka serbskich spěwarskich towarstwow w kooperaciji ze Serbskim ludowym ansamblom, Domowinu a Załožbu za serbski lud je dźak wšitkim angažowanym spěwarjam a twori historiski wjeršk po přikładźe serbskeho spěwanskeho swjedźenja w lěće 1845.

Spěwarjo, kiž su we wjacorych chórach, njech so jenož w jednym přizjewja. Jednotliwcy, kotřiž maja zajim, ale žanomu chórej njepřisłušeja, móža so tohorunja hač do 25.10. w sekretariaće Domowiny přizjewić (sekretariat@domowina.de, 03591-550102). Přinošk za wječor scomter wječerju wučinja 15 eurow. Zarjadowarjo darmotne dowoženje z busom poskićuja. Rejzka Krügerowa, ze stron Domowiny jako projektowa managerka sobu zamołwita za tón projekt, praji:  „Chórowa hudźba je hač do dźensnišeho sylny zakład našeje serbskeje identity. Zhromadny serbski spěwanski swjedźeń twori jónkrótne dožiwjenje za kóždeho serbskeho spěwarja. Tohodla prosymy wo Waše bórzomne přizjewjenje z prawdźepodobnej ličbu wobdźělnikow, zo bychmy tutón historiski wjeršk Serbstwa dale z połnej paru přihotować móhli.”

Formular w lisće pósćelće prošu na: Domowina, c/o přihotowanski wuběrk „Serbski spěwanski swjedźeń”, Póstowe naměsto 2, 02625 Budyšin abo: rejzka.kruegerowa@domowina.de . Maće-li hišće prašenja, wobroćće so prošu na projektowu managerku Rejzku Krügerowu: 03591-550291.