Sobotu, 19. smažnika/junija so prěni raz zwjazkowe předsydstwo w nowej zestawje po hłownej zhromadźiznje schadźuje. Zjawny dźěl konstituowaceho posedźenja so wot 9 hodź. do 12 hodź. na žurli Serbskeho domu w Budyšinje wotměje – tež z digitalnym přistupom. Zajimcy móža wuradźowanje přez livestream na www.domowina.de/start sćěhować.

Najprjedy so čłonojo zwjazkoweho předsydstwa mjez sobu předstajeja, potom zarjad Domowiny. Tomu so informacije wo zakładźe dźěławosće gremija přizamknu.

Nic naposledk ma nowe zwjazkowe předsydstwo hnydom wobzamknjeni na starosći: wuzwolenje čłonow mytowanskeho wuběrka Domowiny z namjetow župow a čłonskich towarstwow/zwjazkow w tajnych wólbach a rozsud wo namjeće za powołanje třoch zastupjerjow serbskeho ludu do Poradźowaceho wuběrka za prašenja serbskeho ludu poboku zwjazkoweho ministerstwa nutřkowneho.  

Zastupjerjo serbskich medijow su wutrobnje witani, prosymy wo přizjewjenje.