Kak daloko z debatu wo změnje serbskeje hymny? To běše srjedu (9.2.) w Budyskim Serbskim domje tema rozmołwy předsydki Maćicy Serbskeje, dr. Anje Pohončoweje, a městopředsydki towarstwa, dr. Ines Kelleroweje, z předsydu Domowiny, Dawidom Statnikom, a jednaćelku třěšneho zwjazka, Judit Šołćinej. Maćica Serbska je składnostnje „Lěta Zejlerja a Kocora” pod hesłom „Su jenož ,mužojo hódni wěčnoh wopomnjeća’?” k diskusiji namołwiła. Handrij Zejler běše w lěće 1827 narodnu odu „Na serbsku Łužicu” spisał, kotraž bu z melodiju Korle Awgusta Kocora na prěnim serbskim spěwnym swjedźenju 1845 zjawnje předstajena a je so před nimale sto lětami, 1923, we wujimkach jako serbska hymna přesadźiła.

Předsydstwo wědomostneje towaršnosće Maćicy Serbskeje, našeho najstaršeho serbskeho towarstwa, je w swojej namołwje jako dźěłowy zakład diskusije na jednu móžnu łahodnu změnu skedźbniło, kotraž by žony do wěčneho wopomnjeća zapřijała a paralelne spěwanje stareje a noweje hornjoserbskeje wersije zmóžniła. Tuchwilu rěka: „Ow, zo bychu z twojeho klina wušli mužojo, hódni wěcnoh wopomnjeća”. Nowa wersija móhła być: „Njech nam z klina twojeho wuńdu žony, mužojo, hódni wěcnoh wopomnjeća.” Mnozy Delnjoserbja su hižo dotalnu wersiju po přełožku Hendricha Jordana zlochka změnili, tak zo so paralelnje spěwa: „Och, gab muže/luźe stanuli, / za swój narod źěłali, / gódne nimjer wobspomnjeśa.”

Maćica Serbska diskusiju, zapodate namjety a linki na rozprawy w medijach na swojej internetnej stronje běžnje dokumentuje: https://www.domowina.de/mitgliedschaft/mitgliedsvereine/macica-serbska/sorbische-hymne . Hromadźe z Domowinu chcedźa nětko diskusiju w Serbach pohłubšić a wšěm zajimcam zmóžnić, so na dalšej debaće wobdźěleć.

Dr. Anja Pohončowa a dr. Ines Kellerowa za Maćicu Serbsku: „Bychmy so wjeselili, by-li so diskusija w župach, Domowinskich skupinach a towarstwach dale wjedła. Rady podpěrujemy tež debaty w małych skupinach z wědomostnymi ekspertami, kotřiž móhli na zakładźe stawizniskeje wědy impulsy dawać. So wě, zo nadźijamy so tež wjetšeho diskusijneho foruma zhromadnje ze Serbskimi Nowinami po kóncu tuchwilnych postajenjow w zwisku z pandemiju. Cyła diskusija so zakładnych načasnych towaršnostnych prašenjow a bytostneje temy wobchadźenja z tradicijemi dótka. Tohodla je nam wažne, zo so bjez časoweho ćišća woměrje wuměnjamy.”

Dawid Statnik a Judit Šołćina za Domowinu: „Naša hymna njeje z njebjes padnyła, ale historisce zrosćeny produkt našich zhromadnych stawiznow, kotrež maja tež žiwe generacije dale pisać. Namołwjamy wše cyłki třěšneho zwjazka, na tutej debaće aktiwnje podźěl brać. Maćica Serbska je zaměrnej diskusiji wo temje puć rubała, wo kotrejž je so hižo lěto a husćišo rěčało. Wona ma jako serbska wědomostna towaršnosć stawiznisku, hudźbnu a literarnu kompetencu, tutu debatu moderować a přewodźeć. Po bazodemokratiskim principje narodneje organizacije njech tohodla naše nadregionalne čłonske towarstwo Maćica Serbka wašnje rozestajenja z tutej temu nawjeduje, Domowinski zarjad budźe Maćicy při tym po potrjebje poboku.”

Wobraz: Dr. Anja Pohončowa, dr. Ines Kellerowa, Dawid Statnik, Judit Šołćina (wotl.), foto: Domowina