Wčera su wobydlerki a wobydlerjo Němskeje nowy zwjazkowy sejm wolili. Wjeselimy so, zo su demokratiske strony wjetšinu přiwabili. Je to wuznaće za demokratiju a stabilitu w Němskej.

Hižo do wólbow zwjazkoweho sejma je Domowina rozmołwy z kandidatkami a kandidatami wšelakorych politiskich stronow ze Sakskeje a Braniborskeje wjedła. “Smy so ze zastupjerjemi wšitkich demokratiskich stronow do rozmołwy podali a serbske zajimy, kaž na přikład zaručenje financowanja Załožby za serbski lud, rozjasnili. Rozmołwy su pokazali, zo njejsu serbske temy přeco prezentne.”, tak předsyda Domowiny Dawid Statnik. “Tola wothłós bě přiwšěm pozitiwny. Kandidaća chcedźa so za Serbow zasadźować.” Rozmołwy su so na poskitk Domowiny wotměli.

Rozsudne je, zo su zajimy Serbskeho ludu a druhich narodnych awtochtonych mjeńšinow (weblink) w koaliciskim zrěčenju zakótwjene. Tute su w zhromadnej zakładnej papjerje mjeńšinoweje rady zakótwjene. “Tež hdyž njejsu politiske strony we wólbnych programach narodne mjeńšiny scyła abo dosć derje wobkedźbowali, budźemy zhromadnje z mjeńšinowej radu nowu so wutworjacu koaliciju wužadać, zo so narodne mjeńšiny w koaliciskim zrěčenju wobkedźbuja.”, tak předsyda Dawid Statnik.

Kaž dotal budźe so Domowina wo nawjazanje kontakta wšitkim do zwjazkoweho sejma wolenym demokratiskim stronam prócować, wosebje tež rěčnikam za narodne mjeńšiny w politiskich stronach.

Zdobom dźakuje so třěšny zwjazk wšitkim zapósłancam za dotalne dobre zhromadne dźěło.